कालकुंद्री (ता. चंदगड) शिवारात बसाप्पा बिराप्पा हारुगेरी या मेंढपाळावर हल्ला करून गंभीर जखमी केलेल्या गव्याचा उष्माघाताने कौलगे (ता. चंदगड) गावानजीक वनविभागाच्या अखत्यारीतील तळ्याजवळ मृत्यू झाला.
दरम्यान, या गव्याने कुदनूर येथील आनंदी बंबर्गेकर, यल्लूबाई बंबर्गेकर, माधुरी खामकर या तीन महिलांना धडक मारून जखमी केले होते. वनक्षेत्रपाल दत्ता पाटील हे जखमीची विचारपूस करण्यासाठी यमकनमर्डी व कुदनूर येथे गेले असता गव्याच्या मृत्यूची बातमी समजली. वनपाल जी. एम. होगाडे, वनरक्षक दीपक कदम, वनमजूर लहू पाटील, वैद्यकीय अधिकारी शिवगण आदींचे पथक घटनास्थळी दाखल झाले.
पूर्ण वाढ झालेला चार ते पाच वर्षांचा हा नर गवा कळपापासून दूर गेल्याने सैरभैर झाला होता. धावपळीत उष्म्याने हैराण झालेला गवा त्याचा मूळ रहिवास असलेल्या वैजनाथ डोंगर रांगांकडे जाताना मार्गावरील कौलगेनजीक तळ्यात पाणी पिण्यासाठी उरतला असावा. दुर्दैवाने चार दिवसांत झालेल्या पावसामुळे झालेल्या गाळात अडकून धडपडीत त्याचा मृत्यू झाला.
मृत्यूपूर्वी येथील तरुणांनी त्याला बाहेर काढण्याचा केलेला प्रयत्न व्यर्थ ठरला. पंचनामा व शवविच्छेदनानंतर गव्याला दफन करण्यात आले.
याकामी कौलगेचे पोलीस पाटील सटुप्पा मेणसे, मारुती बिर्जे, सुनील पाटील यांचे सहकार्य लाभले.
दरम्यान, गव्याच्या हल्ल्यात जखमी धनगर बसाप्पा हारुगेरी व महिलांना वनविभागामार्फत नुकसानभरपाई मिळवून देण्यासाठी सर्वतोपरी सहकार्य करणार असल्याचे वनक्षेत्रपाल दत्ता पाटील यांनी सांगितले.
-------------------------
* फोटो ओळी : कौलगे (ता. चंदगड) गावानजीक वनविभागाच्या अखत्यारीतील तळ्यामध्ये मृतावस्थेत आढळून आलेला गवा.
क्रमांक : २१०४२०२१-गड-०५