कोविशिल्ड लस घेण्याचे प्रमाण वाढले

कोल्हापूर : एकीकडे जिल्ह्यात कोविशिल्ड लस घेणाऱ्या आरोग्य कर्मचाऱ्यांचे प्रमाण वाढले असताना, दुसरीकडे कोरोना पाॅझिटिव्ह रुग्णांची संख्या गेल्या काही दिवसात वाढली आहे. त्यामुळे ४० च्या आत आलेली रुग्णसंख्या सध्या १०२ वर पोहोचली आहे, तर दोघांचा मृत्यू झाला आहे.

कोविशिल्ड देण्याच्या तिसऱ्या दिवशी बुधवारी जिल्ह्यात ११०० लसीकरणाचे उद्दिष्ट असताना दिवसभरामध्ये ७७८ जणांनी लस घेतली आहे. यामध्ये जाणीवपूर्वक वैद्यकीय अधिकाऱ्यांना लस घेण्याच्या सूचना करण्यात आल्या आहेत. दिवसभरात सीपीआरमधील डॉ. अनिता सैब्बनावर, डॉ. हर्षला वेदक, डॉ. शानबाग यांनी ही लस टोचून घेतली. कसबा बावडा येथील सेवा रुग्णालयामध्ये तर लस घेण्यासाठी आशा स्वयंसेविकांनी रांग लावली होती. शिरोळ ग्रामीण रुग्णालयामध्ये दिवसभरामध्ये उद्दिष्टपूर्ती झाली असून तेथेही १०० जणांनी लस घेतली आहे. उपजिल्हा रुग्णालय गडहिंग्लज येथेही १०० जणांनी लस घेतली. कोल्हापूर शहरामध्ये लसीकरणाला चांगला प्रतिसाद आहे.

कोल्हापूर शहरामध्ये ६ पाॅझिटिव्ह रुग्ण आढळले असून नगरपालिका क्षेत्रात ४, तर इतर जिल्ह्यातील दोघांना लागण झाली आहे. दिवसभरामध्ये २८६ जणांची तपासणी करण्यात आली असून ९०१ जणांचे स्वॅब घेण्यात आले आहेत. १३९ जणांची ॲन्टिजेन टेस्ट घेण्यात आली असून सध्या १०२ जणांवर उपचार सुरू आहेत. शिवाजी पेठ कोल्हापूर येथील ७४ वर्षीय व्यक्तीचा, तर डोंबिवली वेस्ट येथील ६५ वर्षीय पुरूषाचा कोरोनामुळे बुधवारी मृत्यू झाला.

चौकट

सीपीआरमध्येच प्रतिसाद कमी

एकीकडे सीपीआरमधील आरोग्य कर्मचाऱ्यांनी लस घेण्यासाठी ८०० हून अधिक जणांनी नोंदणी केली आहे. मात्र याच ठिकाणी लसीकरणाला कमी प्रतिसाद मिळत असल्याचे चित्र आहे. बुधवारी दिवसभरामध्ये १०० जणांना लस टोचायची असताना, केवळ १३ जणांनी लस टोचून घेतली आहे. आरोग्य कर्मचाऱ्यांनी लस घेण्यासाठी त्यांना उद्युक्त करण्यामध्ये सीपीआरच कमी पडत असल्याचे दिसून येत आहे.

चौकट

सीपीआरमध्ये हृदयशस्त्रक्रिया सुरू

गेले वर्षभर सीपीआरमध्ये बंद असलेल्या हृदयशस्त्रक्रिया पुन्हा सुरू करण्यात आल्या आहेत. ‘लोकमत’सह शिवसेनेच्या पाठपुराव्यामुळे अखेर या विभागासाठी भूलतज्ज्ञ म्हणून डॉ. हेमलता देसाई यांची नियुक्ती करण्यात आली असून मंगळवारी पहिली शस्त्रक्रिया करण्यात आली आहे. आता देसाई यांची नियुक्ती झाल्यामुळे नव्याने हृदयशस्त्रक्रियांचे नियोजन करण्यात येत असल्याचे सांगण्यात आले.

चौकट

फायर ऑडिटसाठी जिल्हा नियोजनकडे निधीची मागणी

दरम्यान, जिल्हा परिषदेत बुधवारी आरोग्य समितीची सभा झाली. यामध्ये फायर ऑडिटसाठीचे प्रस्ताव तयार करून त्यासाठी जिल्हा नियोजन समितीकडे निधीची मागणी करावी, अशी सूचना आरोग्य समितीचे सभापती हंबीरराव पाटील यांनी केली. आरोग्य संस्थांच्या उभारणीसाठी जागा देणाऱ्यांना आवश्यक ना हरकत प्रमाणपत्रे मोफत द्यावीत, तालुका पातळीवर औषधांचा वेळेत पुरवठा करावा, अशा सूचना करण्यात आल्या.

यावेळी कोरोना, लसीकरण, कुष्ठरोग, क्षयरोग यासह अन्य आरोग्य योजनांचा आढावा घेण्यात आला.

दीपक जाधव यांचा फोटो वापरावा