कोल्हापूर : महापालिकेच्या वतीने शहरातील निर्माण होणाऱ्या ९६ द.ल.लि. पैकी ९०.९६ द.ल.लि. सांडपाण्यावर प्रक्रिया केली जात असल्याचा दावा महापालिकेच्या वतीने करण्यात आला आहे. हरित लवाद व उच्च न्यायालय यांनी दिलेल्या निर्देशानुसार जयंती नाला येथे ब्लिचिंग पावडरचा डोस देण्यात येत असून, पारंपरिक पद्धतीने आळू व कर्दळ यांची लागवड देखील करण्यात आली असल्याचे पालिकेने म्हटले आहे.
दोन दिवसांपूर्वी प्रदूषण नियंत्रण मंडळाने नदीचे प्रदूषण केल्याप्रकरणी महानगरपालिकेला नोटीस बजावली होती, त्यापार्श्वभूमीवर महानगरपालिकेने दिलेल्या प्रसिद्धिपत्रकात हा दावा केला आहे.
शहराला पुईखडी, बालिंगा, कळंबा व बावडा येथील जलशुद्धिकरण केंद्रामार्फत रोज १२० द.ल.लि. पाण्याचा उपसा केला जात असून त्यापैकी वितरण केलेल्या पाण्यापासुन सुमारे ९६ द.ल.लि. सांडपाण्याची रोज निर्मिती होते. यापैकी ९० द.ल.लि. सांडपाण्यावर महापालिकेच्यावतीने प्रक्रिया केली जाते.
शहरालगतच्या कळंबा, पाचगाव, आर.के. नगरचा काही भाग आणि मोरेवाडी गावातील सांडपाणी रोज जयंती नाल्यात मिसळत असल्याने सांडपाण्याच्या प्रमाणात वाढ होत आहे. त्याचा ताण महापालिकेच्या यंत्रणेवर पडत असल्याचे पालिकेचे म्हणणे आहे.
पंपिंग स्टेशनची कार्यक्षमता -
जयंती नाला - सहा पंप असून, त्यापैकी ४५० अश्वशक्तीचे दोन पंप कायमस्वरूपी कार्यरत. चार पंपांमध्ये तांत्रिक बिघाड झाल्यामुळे बंद. दुरुस्तीचे काम युद्धपातळीवर सुरू.
लाईन बाझार नाला- १३० अश्वशक्तीचे सबमर्सिबल पंपचे दोन सेट नोव्हेंबर २०१९ पासून कार्यरत. तेथून पाच द.ल.लि. पाणी उपसा होतो.
बापट कॅम्प नाला - १२० अश्वशक्तीचे सबमर्सिबल पंपचे तीन सेट व ८० अश्वशक्तीचे दोन पंप डिसेंबर २०१९ पासून कार्यरत. तेथून दहा द.ल.लि. पाणी उपसा होतो.
दुधाळी नाला - १७ द.ल.लि. क्षमतेचे सांडपाणी प्रक्रिया केंद्र. जुलै २०१८ पासून कार्यान्वित.
अमृत दोन पंपिंग स्टेशनची कामे सुरू -
दुधाळी येथे सहा द.ल.लि. व लाईन बाझार येथे चार द.ल.लि. क्षमतेचे सांडपाणी प्रक्रिया केंद्र उभारण्याचे काम प्रगतिपथावर आहे. तसेच पाच नाले अडविणे व वळविण्याचे काम हाती घेतले असुन, प्रगतिपथावर आहे.