कोमनपास ६ कोटी ४३ लाखाचे अनुदान

नगरविकास विभागाची मान्यता : ‘एलबीटी’मुळे उत्पन्नातील घट भरुन काढण्यासाठी दिलासा

कोल्हापूर : स्थानिक संस्था कर (एलबीटी) रद्द केल्यामुळे उत्पन्नात येणारी घट भरून काढण्यासाठी कोल्हापूर महानगरपालिकेस ६ कोटी ४३ लाख सहायक अनुदान देण्यास २० आॅगस्टला शासनाच्या नगरविकास विभागाने मान्यता दिली आहे. त्यामुळे आर्थिक संकटात असलेल्या महानगरपालिकेस दिलासा मिळणार आहे. राज्यातील २५ महानगरपालिकांना ४१९,६९,००,००० रुपये वितरीत करण्यात येणार आहेत. एलबीटी महानगरपालिकेचे (मनपा)उत्पन्नाचे प्रमुख स्रोत आहे. एलबीटीवरच कर्मचाऱ्यांचा पगार व विकासकामे केली जात होती. दरम्यान, १ आॅगस्टपासून ५० कोटींपेक्षा कमी आर्थिक उलाढाल असलेल्या सर्व व्यापाऱ्यांंची एलबीटीतून मुक्तता करण्यात आली. त्यामुळे महानगरपालिकेचे उत्पन्न घटले. मनपास कर्मचाऱ्यांचे पगार भागविण्यासाठी पैसे नसल्याची परिस्थिती निर्माण झाली. याप्रमाणे राज्यातील सर्वच मनपांची आर्थिक परिस्थिती कमकुवत झाली. एक टक्का मुद्रांक शुल्क अधिभारापासून प्राप्त होणारे उत्पन्न व ५० कोटींपेक्षा अधिक उलाढाल असलेल्या व्यापाऱ्यांकडील एलबीटी मनापचे उत्पन्नाचे स्रोत झाले आहेत. त्यातून मिळणारे उत्पन्न व सन २०१५- १६ वर्षात करापासून मिळणारे संभाव्य उत्पन्न यामध्ये येणारी तूट शासन अनुदानाच्या स्वरूपात दिली जात आहे. मनपाना दैनंदिन खर्च भागविण्यासाठी सप्टेंबर २०१५ साठी अनुदानाचा दुसरा हप्ता देण्यास नुकतीच शासनाने मान्यता दिली आहे.