जळगाव : गेल्या काही वर्षांमध्ये अपघाताचे प्रमाण वाढले आहे. या अपघातांवर नियंत्रण मिळविण्यासाठी तसेच बेशिस्त वाहनचालकांवर कारवाई करून, वाहतुकीला शिस्त लावण्यासाठी पोलीस दलाकडून ’इंटरसेप्टर व्हेइकल’ खरेदी करण्यात आल्या आहेत. यात लेझर तंत्रज्ञानावर आधारित स्पीडगन, ई-चलन यंत्रणा, मद्यपींवर कारवाई करण्यासाठी ब्रेथ अॅनलायजर अशी अत्याधुनिक यंत्रणा आहेत. या वाहनाद्वारे वर्षभरात ४१०५ वाहनांचा स्पीड रोखण्यात आला असून ३७ लाख ८ हजाराचा दंड या वाहनधारकांना आकारण्यात आलेला आहे.
‘अति घाई, संकटात नेई’ अशी वाक्ये महामार्गावरील फलकांवर लिहिण्यात आली आहेत. याचा अर्थ असा की वाहनांचा वेग मर्यादेत ठेवणे अपेक्षित आहे. वाहतूक पोलिसांच्या ताफ्यात ’इंटरसेप्टर व्हेइकल’ हे वाहन देण्यात आले आहे. या वाहनात साडे बारा लाख रुपये किमतीचा कॅमेरा बसविण्यात आला असून या कॅमेऱ्याद्वारे ५०० मीटर ते १ कि.मी.पर्यंत वाहनाचा वेग व त्याचा क्रमांक सहज घेता येतो, त्याशिवाय तीन कि.मी.पर्यंत वाहनाचा वेग किती आहे हे कॅमेऱ्याद्वारे टिपता येते.
लडाखमध्ये दोन वर्षे सराव
स्पीडगन वाहनाबाबत चार आयपीएस अधिकाऱ्यांनी यूएस पॅटर्ननुसार सलग दोन वर्ष यावर मेहनत घेऊन लडाखमध्ये सराव घेतला, त्यानंतर स्पीडगन वाहन देशभरातील पोलीस दलाच्या ताफ्यात समाविष्ट करण्यात आले. जिल्ह्यातील महामार्गावर चारचाकी कारला ८०, दुचाकी व ट्रकला ७० चा वेग निश्चित करण्यात आला आहे. मुंबई-नागपूर समृध्दी महामार्गावर १५० तर मुंबई-पुणे एक्सप्रेस वे साठी १२० चा वेग निश्चित करण्यात आला आहे.
धावत्या वाहनांची मोजली जाते गती
‘इंटरसेप्टर व्हेइकल’मध्ये लेझर तंत्रज्ञानावर आधारित स्पीडगन आहे. पूर्वी रस्त्याच्या कडेला थांबून, स्पीडगनद्वारे कारवाई केली जात होती. आता नव्या वाहनात स्पीडगन ठेवण्याची सुविधा (ट्रायपॉड) आहे. एखादे भरधाव वाहन गेले व स्पीडगनव्दारे त्याचा वेग मर्यादेपेक्षा जास्त असल्याचे कळते. त्यानुसार व्हेईकलमधील कॅमेऱ्याव्दारे ५०० मीटर ते १ कि.मी पर्यंतच्या वाहनाचे छायाचित्र काढले जाते. वाहनाच्या क्रमांकावरुन थेट वाहन मालकाला थेट ई-चालान पाठविले जाते. तीन किलोमीटरपर्यंत असलेल्या वाहनाची गती या स्पीडगनतर्फे मोजली जाते.