चाळीसगाव : कोणतीही वैद्यकीय पदवी नसताना शिरसगाव येथे कोरोनाबाधित रुग्णांवर उपचार करणाऱ्या बोगस डॉक्टरच्या मुसक्या मंगळवारी बोगस डॉक्टर शोध समितीने आवळल्या.
मुन्नाभाई एमबीबीएसला जेरबंद करण्यात आले असून मेहुणबारे पोलिसात गुन्हा दाखल करण्यात आला आहे. यामुळे परिसरातील बोगस डॉक्टरांमध्ये मोठी खळबळ उडाली आहे.
याबाबत माहिती अशी की, शिरसगाव येथे एका वयोवृद्ध महिलेच्या घरात माधवराव देवराम पंडित हा बोगस डॉक्टर न्यूमोनियासदृश आजारावर औषधोपचार करीत असल्याचे शिरसगाव प्राथमिक आरोग्य केंद्राचे डॉक्टर मुश्ताक सय्यद यांनी तालुका वैद्यकीय अधिकाऱ्यांना कळविले. त्यानुसार समितीमधील तालुका वैद्यकीय अधिकारी डॉ. देवराम लांडे, गटविकास अधिकारी नंदकुमार वाळेकर, आरोग्य विस्तार अधिकारी प्रदीप सोनवणे यांच्यासह दोन शासकीय पंचांनी सापळा लावून छापा टाकला असता माधवराव देवराम पंडित हा रुग्णांवर उपचार करताना आढळून आला. त्याच्याकडे महाराष्ट्र मेडिकल कौन्सिल ऑफ इंडियाची कागदपत्रे मागितली असता, ते आपल्याकडे नाहीत, असे सांगितले. डॉ. देवराम लांडे यांच्या फिर्यादीवरून मेहुणबारे पोलीस स्थानकात गुन्हा नोंदविण्यात आला आहे.