जळगाव : शहराचे आमदार सुरेश भोळे यांनी मुख्यमंत्री उद्धव ठाकरे यांच्यावर केलेल्या टीकेचा समाचार घेत शिवसेना महानगर प्रमुख शरद तायडे यांनी सुरेश भोळे यांना आपली पात्रता तपासण्याचा सल्ला एका प्रसिद्धिपत्रकाद्वारे दिला आहे.
महाराष्ट्राचे मुख्यमंत्री उद्धव ठाकरे यांच्यावर शहराचे आमदार सुरेश भोळे यांनी ट्विटरच्या माध्यमातून टीका केली होती, त्यास तायडे यांनी उत्तर दिले आहे. आमदार भोळे यांनी शहरातील जनतेला मामा बनवण्याचे धंदे बंद करावेत. ज्यांना आपल्या पक्षातले नगरसेवक कंटाळले होते त्यांना मुख्यमंत्र्यांवर बोलण्याचा अधिकार नाही. महाविकास आघाडी सरकारच्या कामावर विश्वास ठेवून अनेक नगरसेवक जि. प. सदस्य भाजपाला सोडचिट्ठी देत आहेत. ज्या उध्दव ठाकरे यांच्यावर टीका केली त्यांच्याच आदेशाने आम्ही आपल्यासाठी निवडणुकीत मते मागितल्याची आठवण कदाचित आमदारांना नसावी. यापुढे जर मुख्यमंत्र्यांवर टीका केली तर शिवसेना आपल्या स्टाईलने उत्तर देईल असा इशारा शिवसेनेच्या महानगरप्रमुखांनी दिला आहे.