जळगाव : जिल्ह्यात एकीकडे ग्रामीण भागात अचानक कुपोषित बालकांची संख्या तीन ते चार पटीने वाढल्याचे समोर आले आहे. त्यातच शहरात मात्र, अतिपोषण अर्थात कोविडच्या काळात मुलांमध्ये स्थूलतेचे प्रमाण वाढले आहे. कोविडच्या काळात टीव्ही आणि मोबाईलसमोरच अधिक वेळ जात असल्याने मुलांच्या शारीरिक हालचाली कमी झाल्या आहेत. त्यामुळे ही समस्या निर्माण झाल्याचे डॉक्टरांचे म्हणणे आहे.
स्थूलपणावर वेळेवर नियंत्रण मिळविले नाही तर रक्तदाब आणि मधुमेहासारखे आजार यातून उद्भवू शकतात. शिवाय कोविड काळात स्थूलपणा धोकादायी ठरू शकतो हे पहिल्या व दुसऱ्या लाटेत समोर आले आहे. तिसऱ्या लाटेत लहान मुले अधिक बाधित होऊ शकतात, असा एक अंदाज तज्ञांनी वर्तविला आहे. त्या दृष्टीने पालकांनीही लहान मुलांच्या आरेाग्याकडे लक्ष देणे गरजेचे असल्याचे डॉक्टरांचे म्हणणे आहे.
जिल्ह्यातील कुपोषित बालके
तीव्र कुपोषित -१३४५
मध्यम कुपोषित - ६२०२
शहरांत स्थूलता ही नवी समस्या
शहरात लहान मुलांमधील स्थूलता ही नवीन समस्या समोर येत आहेत. शारीरिक श्रम कमी असणे यासह गोड, मैद्याचे, बाहेरचे तेलगट, तुपकट खाणे, पोष्टिक आहार न घेणे या बाबींमुळे ही समस्या समोर येत आहे. याचे रूपांतर पुढे चालून रक्तदाब आणि मधुमेहात होत आहे. याची संख्या झपाट्याने वाढत आहे.
कारणे काय?
कोविडमुळे लहान मुले सध्या घरातच बसून आहेत. त्यांचे खेळणे, बागडणे शारीरिक हालचाली अतिशय कमी झाल्या आहेत. त्यातच जेवताना टीव्हीसमोर बसून जेवणे, मोबाईल पाहता पाहता जेवणे, शिवाय पूर्ण वेळ घरात राहत असल्याने सारखे खात राहणे या बाबींमुळे लहान मुलांमध्ये वजनवाढीची समस्या या कोविड काळात उद्भवली असल्याचे बालरोगतज्ञ सांगतात.
स्थूलपणामुळे कोविडमध्ये धोका
अतिस्थूलपणा असलेल्यांना रक्तदाब आणि मधुमेह होण्याचा धोका अधिक असतो. लहान मुलांमध्ये स्थूलपणा वाढत असल्याने त्यांना हा धोका अधिक आहे. त्यातच १८ वर्षांखालील मुलांचे कोविड प्रतिबंधक लसीकरण झालेले नाही. त्यामुळे तिसऱ्या लाटेत या मुलांना संसर्ग होण्याची शक्यता अधिक आहे. त्यातच स्थूल व्यक्तींना कोविडचा संसर्ग झाल्यास त्यांची प्रकृती गंभीर होऊ शकते. त्यामुळे यावर नियंत्रण मिळविणे गरजेचे असल्याचे डॉक्टर सांगतात.
कोट
कोविड काळात घरातच बसून असल्याने व शारीरिक हालचाली कमी असल्याने लहान मुलांमध्ये स्थूलतेचे प्रमाण वाढत आहे. यासाठी घरातच काही व्यायाम करावे, त्यात पायऱ्या चढउतार करणे, दोरीच्या उड्या, चालणे, आदी यासह पोष्टिक आहार घ्यावा, साखर, मैदा, तेलगट व तूपकट चरबीयुक्त अन्न कमी असावे, लहान मुलांनी टीव्हीसमोर बसून जेवणे बंद करावे किंवा जेवताना मोबाईल पाहू नये. - डॉ. दीपक अटल, बालरोगतज्ञ