जळगाव : तालुक्यातील सावखेडा शिवारात जलाराम मंदिराच्या मागे गिरणा नदीपात्रात मंगळवारी दुपारी १२ वाजून २५ मिनिटांच्या सुमारास २५ ते ३० वर्षीय अनोळखी तरुणाचा मृतदेह आढळून आला आहे. ओळख पटविण्याचे आवाहन करण्यात आले आहे.
सावखेडा बुद्रूक येथील पोलीसपाटील चंद्रकांत उत्तमराव सोनवणे यांना गिरणा नदीपात्रात अनोळखी तरुणाचा मृतदेह पडलेला असल्याची माहिती मिळाली. त्यांनी घटनास्थळी जाऊन पाहणी केली असता, मृतदेह पाण्यात पडून असल्याने तो कुजला होता तसेच त्याला दुर्गंधी सुटलेली होती. पोलीसपाटील चंद्रकांत सोनवणे यांनी याबाबत तालुका पोलीस ठाण्यात माहिती दिली. त्यानुसार पोलीस हवालदार अनिल तायडे यांच्यासह कर्मचार्यांनी घटनास्थळ गाठून पाहणी केली व पंचनामा केला. याप्रकरणी पोलीसपाटील चंद्रकांत सोनवणे यांच्या खबरीवरून तालुका पोलीस ठाण्यात अकस्मात मृत्यूची नोंद करण्यात आली आहे. वय अंदाजे २५ ते ३० वर्ष, शरीराने सडपातळ, रंगाने सावळा, चेहरा गोल, अंगात बदामी रंगाचा शर्ट, गदड बदामी रंगाची पॅन्ट असे मयताचे वर्णन आहे. या वर्णनावरून ओळख पटविण्याचे आवाहन तालुका पोलिसांनी केले आहे.