जळगाव - नुकत्याच झालेल्या महासभेत भाजपाने विराेध केल्यानंतरही बहुमताने मंजुर करण्यात आलेल्या ठरावांची भाजपाने प्रशासनाकडे मागणी केली आहे. नगरसेविका ॲड. शुचिता हाडा यांनी यासंदर्भात नगरसचिवांना पत्र देवून ठरावांची पत्र मागितली आहे. गाळे लिलाव, वाॅटर ग्रेससाठी लवाद नियुक्ती, महिला स्वच्छतागृह, पिंप्राळा येथील मनपा रूग्णालय, ४२ काेटी रूपयांच्या निधीसंदर्भात ठराव करण्यात आले आहेत. या सर्व विषयांवर भाजपाने विराेधाची भुमीका बजावली आहे. त्यामुळे हे ठराव विखंडनासाठी शासनाकडे पाठविण्यात येणार आहेत. त्यासाठीच ॲड. हाडा यांनी मंगळवारी नगरसचिवांना पत्र देवून ठरावांची मागणी केली.
भाजपतर्फे रिक्षा चालकांकरिता ऑनलाईन कक्ष स्थापन
जळगाव - कोरोनामुळे आर्थिक संकटात सापडलेल्या परवानाधारक रिक्षाचालकांना सानुग्रह अनुदान योजनेचा लाभ मिळावा यासाठी भाजपतर्फे नूतन मराठा कॉम्प्लेक्समधील आमदार सुरेश भोळे यांच्या जनसंपर्क कार्यालयात सेवा कक्ष स्थापन करण्यात आला आहे. मंगळवारपासून या ठिकाणी ऑनलाइन अर्ज भरण्यास सुरुवात करण्यात आली असून, या कक्षाचे उद्घाटन आमदार सुरेश भोळे यांच्या हस्ते करण्यात आले. यावेळी महानगराध्यक्ष दीपक सूर्यवंशी, ऑटो रिक्षा चालक-मालक संघटनेचे राज्य उपाध्यक्ष प्रल्हाद सोनवणे, भाजप ऑटो रिक्षा स्कूल व्हॅन आघाडीचे महानगर जिल्हाध्यक्ष प्रमोद वाणी, उपाध्यक्ष संदीप वाणी, रिक्षा चालक रमेश सोनार, काशिनाथ चौधरी, शरद जोशी, गणेश चौधरी, सुभाष पाटील, हितेंद्र टेकावडे आदी उपस्थित होते. हा कक्ष ५ जून पर्यंत सुरू राहणार आहे.