जळगाव : बुधवारपासून पाचवी ते आठवीच्या वर्गांची घंटा घणघणणार आहे़ या पार्श्वभूमीवर शिक्षकांना कोरोना चाचणी करणे बंधनकारक केले आहे. त्यामुळे तपासणीसाठी शासकीय वैद्यकीय महाविद्यालय व रुग्णालयात शिक्षकांची गर्दी होत आहे. म्हणून या रुग्णालय व्यतिरिक्त इतरही चाचणीची व्यवस्था करण्यात यावी, अशी सूचना जिल्हाधिकारी अभिजित राऊत यांनी मनपा आयुक्त व प्राथमिक, माध्यमिक शिक्षणाधिकारी यांना केली आहे.
पहिल्या टप्प्यात इयत्ता नववी ते बारावीच्या वर्गांना सुरुवात झाल्यानंतर बुधवारपासून दुसरा टप्प्यात इयत्ता पाचवी ते आठवीच्या वर्गांना सुरुवात होईल. सुरक्षित अंतर ठेवूनच विद्यार्थ्यांना बाकांवर बसविण्याच्या सूचना शिक्षण विभागाकडून शाळांना करण्यात आल्या आहेत.
इन्फो
सोमवारी जिल्हाधिकाऱ्यांनी काढले पत्र
कोरोना चाचणी करण्यासाठी जिल्हाभरातील शिक्षक शासकीय वैद्यकीय महाविद्यालय व रुग्णालयात येत आहेत. शासकीय वैद्यकीय महाविद्यालयात संशयित रुग्णांची तपासणी व त्यांच्यावर तातडीने उपचार करण्याची कार्यवाही सुरू असून त्याचवेळी इतर नॉन कोविड रुग्णांवरही उपचार सुरू आहे. त्यामुळे वैद्यकीय महाविद्यालयात गर्दी होऊ नये व शिक्षकांना तपासणी करणे सोयीचे व्हावे म्हणून वैद्यकीय महाविद्यालय व्यतिरिक्त इतर ठिकाणी तपासणीसाठीची व्यवस्था करण्यात यावी, अशा सूचनेचे पत्र जिल्हाधिकाऱ्यांनी मनपा आयुक्त व प्राथमिक, माध्यमिक शिक्षणाधिकारी यांना सोमवारी काढले आहे.
आकडे दृष्टिक्षेपात
१) शिक्षकांना आरटीपीसीआर किंवा ॲन्टिजन कोविड चाचणी करण्याचेही आदेश दिले गेले आहेत.
२) जळगाव जिल्ह्यात इयत्ता पाचवी ते आठवीच्या वर्गासाठी ७ हजार ४६५ शिक्षक आहेत तर २ हजार २९८ शिक्षकेतर कर्मचारी आहेत़
३) रविवारपर्यंत ३० शिक्षकांची कोरोना चाचणी करण्यात आलेली होती.