लोकमत न्यूज नेटवर्क
जळगाव : कोविशिल्ड किंवा कोव्हॅक्सिन कुठलीच लस न आल्याने महापालिकेच्या सर्व केंद्रांसह रोटरी भवन व रेडक्रॅास असे सर्व केंद्र सलग दुसऱ्या दिवशी बंद राहणार आहे. दरम्यान, बुधवारी सायंकाळपर्यंत कोव्हॅक्सिनचे १२०० तर काेविशिल्डचे २० हजार ४०० डोस येणार असून गुरूवारी ते केंद्रांवर उपलब्ध होणार आहेत.
कोविशिल्डच्या तुलनेत कोव्हॅक्सिनचा शासकीय यंत्रणेत अत्यंत कमी पुरवठा होत आहे. त्यामुळे अनेकांचा दुसरा डोस लांबला आहे. त्यातच आता येणारे डोसही अत्यल्प असून यातून केवळ दुसऱ्या डोसचे नियेाजन करण्यात आले आहे. मंगळवारी जिल्हाभरात १४६२ जणांनी कोविशिल्डचा पहिला डोस घेतला तर केवळ २५ जणांनी दुसरा डोस घेतला आहे. दुसऱ्या डोसला या साठ्यात प्राधान्य असताना पहिला डोस घेणाऱ्यांची संख्या मात्र, अधिक असल्याचे चित्र आहे. लस उपलब्ध नसल्याने मंगळवारी शहरातील सर्व केंद्र बंद होते. मंगळवारीही लस न आल्याने बुधवारीही सर्व केंद्र बंद राहणार आहे अशी माहिती प्रमुख वैद्यकीय अधिकारी डॉ. राम रावलानी यांनी दिली. खासगीतील एका केद्रावर लसीकरण सुरू करण्यात आले आहे.