जिल्ह्यातील अनेक वृध्द कलावंत पारंपरिक कला जोपासून आजही समाजात जनजागृतीचे काम करीत आहेत. अशा वृध्द कलावंतांना शासनाच्या वतीने माधन दिले जाते. हे मानधन मिळावे यासाठी जिल्ह्यातील ६९० जणांनी जिल्हा परिषद समाज कल्याण विभागाकडे २०१९- २० मध्ये अर्ज दाखल केले आहेत. तर सन २०२०- २१ मध्ये ३६८ अर्ज दाखल झाले आहेत. शासनस्तरावरून निधी प्राप्त न झाल्याने संबंधितांना निधीचे वाटप करण्यात आलेले नाही. अनुदान मिळावे, यासाठी कलावंतांचे मात्र, कार्यालयात खेटे सुरू आहेत.
समिती गठीत नाही
वृध्द कलावंतांसाठी असणारी जिल्हास्तरीय समिती बरखास्त होवून दोन वर्षाचा कालावधी लोटला आहे. परंतु, या समितीचेही गठण करण्यात आलेले नाही. त्यामुळे दाखल होणाऱ्या प्रस्तावांची छाननी करणार कोण ? असा प्रश्नही अधिकाऱ्यांसमोर उभा आहे.
मी २०१३ पासून अनुदानासाठी प्रस्ताव दाखल करीत आहे. परंतु, त्रुटी दाखवून प्रस्स्ताव नाकारला जात आहे. तर अर्ज दाखल केलेल्यांना अद्याप अनुदान मिळालेले नाही.
-नारायण बडनेरे,
पारध बु.
समाज प्रबोधनासाठी आजही अनेक कलावंत जनजागृतीचे काम करीत आहेत. परंतु या कलावंतांची मानधनासाठी फरफट होत आहे.
उर्मिला सोळुंके
गोंदी
वृध्द कलावंतांना मानधन मिळत नसल्याने आर्थिक कोंडी होत आहे. उत्पन्नाचे दुसरे साधन नसल्याने कलावंतांना मानधन वेळेत मिळणे गरजेचे आहे.
एकनाथ तोडकर
गोंदी
अनुदानासाठी शासनाकडे पाठपुरावा
शासनाच्या वतीने देण्यात येणाऱ्या अनुदानासाठी जिल्ह्यातील वृध्द कलावंतांनी अर्ज दाखल केले आहेत. कलावंतांना देण्यात येणारे मानधन मिळावे, यासाठी शासनाकडे पाठपुरावा केला जात आहे. शिवाय समिती गठीत करण्याचेही प्रयत्न सुरू आहेत.
- नामदेव केंद्रे, उपमुख्यकार्यकारी अधिकारी, जि.प. जालना
मानधन किती (रूपये
प्रती माह )
राष्ट्रीय पातळीवरील कलाकार, साहित्यिक २१००
राज्य पातळीवरील कलाकार, साहित्यिक १८००
जिल्हा पातळीवरील कलाकार, साहित्यिक १५००