US Israel Iran War : पाकिस्तान मध्यस्थीसाठी योग्य देश नाही; इराणच्या खासदाराचे खळबळजनक विधान

इराणच्या एका खासदाराने प्रादेशिक चर्चेत पाकिस्तानच्या मध्यस्थी भूमिकेवर शंका उपस्थित केली आहे. एका महत्त्वपूर्ण राजनैतिक टप्प्यावर पाकिस्तानच्या तटस्थतेबाबत इराणने प्रश्न उपस्थित केले आहे.

इराणच्या नॅशनल सिक्युरिटी अँड फॉरेन पॉलिसी कमिशनचे प्रवक्ते इब्राहिम रेझाही यांनी याबाबत पोस्ट केली आहे.'मध्यस्थीसाठी आवश्यक असलेली विश्वासार्हता पाकिस्तानकडे नाही. सोशल मीडिया प्लॅटफॉर्म 'एक्स' वर केलेल्या पोस्टमध्ये रेझाही यांनी पाकिस्तानला "एक चांगला मित्र आणि शेजारी" असे संबोधले, पण "तो एक योग्य मध्यस्थ नाही" असा दावा केला. पाकिस्तानचा कल नेहमीच अमेरिकेच्या हिताकडे असतो, असेही त्यांनी या पोस्टमध्ये म्हटले आहे.

US Israel Iran War : इराणचा रशिया दौरा डोनाल्ड ट्रम्प यांच्या जिव्हारी! ७२ तासांचा अल्टिमेटम; इराणच्या तेल पाइपलाईन्स रडारवर

"पाकिस्तान उघडपणे अमेरिकेवर टीका करणे टाळत आहे, असा आरोपही त्यांनी केला. लेबनॉनवरील हल्ले असोत किंवा इराणची जप्त केलेली मालमत्ता, अमेरिका आपली आश्वासने पाळण्यात अपयशी ठरली आहे, हे पाकिस्तान कधीच ठळकपणे मांडत नाही. मध्यस्थ हा नेहमीच निष्पक्ष असायला हवा, त्याने एका बाजूला झुकलेले असू नये, असेही त्यांनी यामध्ये म्हटले आहे.

अब्बास अराघची यांचे राजनैतिक प्रयत्न

इराणचे परराष्ट्र मंत्री अब्बास अराघची हे चर्चा जिवंत ठेवण्यासाठी राजनैतिक प्रयत्न वेगाने करत आहेत, यावेळीच या खासदाराने हे विधान केले आहे. अराघची यांनी गेल्या तीन दिवसांत दुसऱ्यांदा इस्लामाबादला भेट दिली, तिथे त्यांनी पाकिस्तानचे लष्करप्रमुख असीम मुनीर यांच्याशी संघर्ष आणि संभाव्य मार्गांवर चर्चा केली.

यापूर्वी अराघची यांनी ओमानचे सुल्तान हैथम बिन तारिक अल-सैद यांच्याशी चर्चा केल्यानंतर पाकिस्तानचे पंतप्रधान शहबाज शरीफ यांची भेट घेतली होती. ओमानमधील चर्चेचा मुख्य केंद्रबिंदू 'होर्मुझची सामुद्रधुनी' आणि त्या क्षेत्रातील सुरक्षा हा होता.

इराणी माध्यमांच्या वृत्तानुसार, ही चर्चा फक्त अण्वस्त्र मुद्द्यापुरती मर्यादित नाही. यात होर्मुझच्या सामुद्रधुनीसाठी नवीन कायदेशीर चौकट, भरपाईची मागणी, भविष्यातील लष्करी कारवाईविरुद्ध हमी आणि अमेरिकेने लादलेले सागरी निर्बंध उठवण्याबाबतच्या प्रस्तावांचा समावेश आहे. इस्लामाबादमधील अल्प मुक्कामानंतर अराघची आता मॉस्को दौऱ्यावर जाणार आहेत.

ट्रम्प यांचे थेट चर्चेचे आवाहन

दुसरीकडे, अमेरिका आणि इराणमधील संघर्ष सोडवण्याचे राजनैतिक प्रयत्न थंडावलेले असताना, अमेरिकेचे राष्ट्राध्यक्ष डोनाल्ड ट्रम्प यांनी मोठे विधान केले आहे. इराणला चर्चा करायची असेल तर ते थेट संपर्क साधण्यास मोकळे आहेत," असे ट्रम्प यांनी म्हटले आहे. अमेरिकेने पुढाकार घेण्यापासून माघार घेतली असून पाकिस्तानमधील नियोजित चर्चेची फेरी रद्द केल्यानंतर ट्रम्प यांचे हे विधान आले आहे.

फॉक्स न्यूजला दिलेल्या मुलाखतीत ट्रम्प म्हणाले, "जर त्यांना बोलायचे असेल, तर ते आमच्याकडे येऊ शकतात किंवा आम्हाला कॉल करू शकतात. तुम्हाला माहिती आहे की तिथे टेलिफोन आहे. आमच्याकडे सुरक्षित लाईन्स उपलब्ध आहेत."