"शांतता करार करा, अन्यथा पुन्हा बॉम्बफेक करु"; ट्रम्प यांचा इशारा; इराणसोबतचा संघर्ष पेटणार?

अमेरिकेचे राष्ट्राध्यक्ष डोनाल्ड ट्रम्प यांनी शुक्रवारी इराणला कडक शब्दांत इशारा दिला आहे.

Donald Trump Warn Iran: मध्य पूर्वेतील देशांमधील युद्ध थांबण्याची चिन्हे सध्यातरी दिसत नाहीत. अमेरिकेचे राष्ट्राध्यक्ष डोनाल्ड ट्रम्प यांनी शुक्रवारी इराणला कडक शब्दांत इशारा दिला आहे. जर बुधवारी संपणाऱ्या मुदतीपर्यंत शांतता करार झाला नाही, तर युद्धविराम वाढवला जाणार नाही आणि अमेरिकन सैन्य पुन्हा एकदा इराणवर बॉम्बफेक सुरू करेल, असे ट्रम्प यांनी स्पष्ट केले आहे.

एअर फोर्स वनवरून ट्रम्प यांची गर्जना

फिनिक्स येथून वॉशिंग्टनला परतत असताना एअर फोर्स वन या विमानात पत्रकारांशी बोलताना ट्रम्प म्हणाले की, "कदाचित मी युद्धविराम वाढवणार नाही, पण इराणच्या बंदरांवरील आमची नाकेबंदी कायम राहील. दुर्दैवाने, जर करार झाला नाही, तर आम्हाला पुन्हा बॉम्बफेक सुरू करावी लागेल."

अमेरिका आणि इराण यांच्यात पाकिस्तानमध्ये झालेली चर्चेची फेरी निष्फळ ठरली आहे. ट्रम्प यांच्या मते, शांतता कराराअंतर्गत इराणमधील युरेनियमचा साठा अमेरिकेकडे हस्तांतरित केला जावा. मात्र, इराणच्या परराष्ट्र मंत्रालयाने हा साठा कोठेही हलवण्यास स्पष्ट नकार दिला आहे. तसेच जागतिक तेलाच्या पुरवठ्यासाठी महत्त्वाच्या असलेल्या या मार्गावरून इराणला कोणतेही शुल्क आकारू दिले जाणार नाही, असे ट्रम्प यांनी ठणकावून सांगितले आहे.

एप्रिलच्या मध्यापासून अमेरिकेने इराणच्या बंदरांची नाकेबंदी केली आहे, ज्यामुळे इराणचा सागरी व्यापार ठप्प झाला आहे. इराणने याला बेकायदेशीर पाऊल म्हटले आहे.

चीनचे अध्यक्ष शी जिनपिंग 'आनंदी'

डोनाल्ड ट्रम्प यांनी एक पोस्ट केली आहे. यामध्ये त्यांनी म्हटले आहे की, जागतिक तेलाचा पुरवठा मार्ग पुन्हा सुरळीत होण्याच्या शक्यतेने चीनचे अध्यक्ष शी जिनपिंग अत्यंत आनंदी आहेत. मे महिन्यात बीजिंगमध्ये होणारी दोन्ही नेत्यांची भेट ऐतिहासिक ठरेल, असा विश्वासही त्यांनी व्यक्त केला.

जागतिक बाजारपेठेत चिंतेचे वातावरण

जगातील २० टक्के तेल आणि नैसर्गिक वायूचा पुरवठा होमुर्झच्या सामुद्रधुनीतून होतो. जर ट्रम्प यांनी दिलेली बुधवारीची डेडलाईन टळली आणि पुन्हा युद्ध सुरू झाले, तर जागतिक बाजारपेठेत इंधनाचे दर कडाडण्याची भीती वर्तवण्यात येत आहे. आता संपूर्ण जगाचे लक्ष बुधवारी होणाऱ्या घडामोडींकडे लागले आहे. त्यातून काही मार्ग निघणार की आखातात पुन्हा युद्धाचा भडका उडणार, हे पाहणे महत्त्वाचे ठरेल.