युक्रेनने रशियाच्या एअरबेसवर हल्ला केल्यानंतर, रशियाचे राष्ट्रपती व्लादिमीर पुतिन स्वस्थ बसणार नाहीत, हे निश्चित होते. आता अमेरिकेचे राष्ट्राध्यक्ष डोनाल्ड ट्रम्प आणि पुतिन यांच्यात फोनवरून दीर्घ चर्चा झाली. यावेळी, आपण युक्रेनच्या हल्ल्याचे कठोर प्रत्युत्तर देणार, असे स्पष्ट संकेत पुतिन यांनी दिले आहेत. यासंदर्भात बोलताना ट्रम्प म्हणाले, आपण बुधवारी रशियाचे राष्ट्रपती पुतिन यांच्यासोबत सुमारे १ तास १५ मिनिटे फोनवर चर्चा केली. ही चर्चा युक्रेनने रशियाच्या एअरबेसवर केलेल्या ड्रोन हल्ल्यानंतर झाली. महत्वाचे म्हणजे, "चर्चा चांगली झाली, मात्र तत्काळ शांतता येणार नाही," असे ट्रम्प यांनी म्हटले आहे.
हल्ल्याचं उत्तर देणार... -
ट्रम्प म्हणाले, पुतिन यांनी रशियावरील ड्रोन हल्ल्यासंदर्भात नाराजी व्यक्त केली असून, आपण याचे उत्तर देणार असे म्हटल आहे. हा हल्ल्याला 'ऑपरेशन स्पायडरवेब' असे नाव देण्यात आले होते. याअंतर्गत युक्रेनने रशियाच्या चार एअरबेसना लक्ष्य केले होते.
इराण अणु करारावर चर्चा -
अमेरिकन राष्ट्राध्यक्ष पुढे म्हणाले, दोन्ही नेत्यांनी इराणच्या अणुकार्यक्रमावरही चर्चा केली. पुतिन म्हणाले, आपण या मुद्द्यावर सुरू असलेल्या चर्चेत मदत करू शकतो. मात्र इराण जाणूनबुजून निर्णयास विलंब करत आहे. आता लवकरात लवकर स्पष्ट उत्तर देण्याची आवश्यकता आहे.
दोन आठवड्यांतील दुसरी चर्चा -
ट्रम्प आणि पुतिन यांच्यातील ही दुसरी चर्चा आहे. यापूर्वी १९ मे रोजी दोन्ही नेत्यांनी फोनवरच चर्चा केली होती. रशिया आणि युक्रेनमध्ये शांततेचे प्रयत्न सुरू असले तरी युद्ध थांबण्याची खात्रीशीर आशा नाही. ट्रम्प यांनी पुतिन यांच्या अलीकडील काही कृतींवर नाराजी व्यक्त केली होती आणि म्हटले होते की, "ते पूर्णपणे वेडे झाले आहे." यापूर्वी ट्रम्प यांनी पुतिन यांना युक्रेनियन शहरांवर क्षेपणास्त्र हल्ले करण्यावरून इशारा दिला होता तसेच "पुतिन आगीशी खेळत आहेत," असे म्हटले होते.
माध्यमांतील वृत्तानुसार, युक्रेनियन ड्रोन हल्ल्यात ४१ रशियन बॉम्बर विमाने नष्ट झाली आहेत. याशिवाय, क्रिमिया ब्रिजलाही लक्ष्य करण्यात आले आहे. हा हल्ला रशियाने अत्यंत गांभीर्याने घेतला असून निर्णायक प्रत्युत्तर देण्याचा इशाराही दिला आहे.