यूरोपातील मृतांचा आकडा 1 लाखवर, जगभरात 23 लाख 32 हजारहून अधिक लोकांना कोरोनाची लागण
By ऑनलाइन लोकमत | Published: April 19, 2020 03:12 PM2020-04-19T15:12:53+5:302020-04-19T15:21:38+5:30
स्पेनचे पंतप्रधान पेड्रो सांचेज यांनी देशातील लॉकडाऊनचा कालावधी 9 मेपर्यंत वाढवला आहे. इटलीतही मृतांचा आकडा सातत्याने वाढत आहे. तेथे आतापर्यंत 23,227 जणांचा कोरोनाने बळी घेतला आहे.
यूरोपातील मृतांचा आकडा 1 लाखवर, जगभरात 23 लाख 32 हजारहून अधिक लोकांना कोरोनाची लागण
Next
नवी दिल्ली : जगभरात कोरोनाने हाहाकार घातला आहे. जगातील कोरोनाबाधितांची संख्या शनिवारीही मोठ्या प्रमाणावर वाढली. आतापर्यंत जगात 23 लाख 32 हजार 700 हून अधिक लोकांना कोरोनाची लागण झाली आहे. तर 1 लाख 60 हजार 747हून अधिक लोकांचा कोरोनामुळे मृत्यू झाला आहे. एकट्या युरोपातच मृतांचा आकडा आता 1 लाखवर जाऊन पोहोचला आहे.
जगभरातील करोनाबाधितांपैकी अर्ध्याहून अधिक लोक एकट्या युरोपातील आहेत. या महामारीमुळे युरोपात 1 लाखहून अधिकल लोकांचा मृत्यू झाला आहे. फ्रान्समध्ये गेल्या 24 तासांत कोरोनामुळे 642 जणांचा मृत्यू झाला. स्पेनमध्ये मृतांचा आकडा 20, 043 वर पोहोचला आहे. स्पेनचे पंतप्रधान पेड्रो सांचेज यांनी देशातील लॉकडाऊनचा कालावधी 9 मेपर्यंत वाढवला आहे. इटलीतही मृतांचा आकडा सातत्याने वाढत आहे. तेथे आतापर्यंत 23,227 जणांचा कोरोनाने बळी घेतला आहे.
जगाचा विचार करता मृत्यूच्या बाबतीत इटलीचा अमेरिकेनंतर दुसरा क्रमांक लागतो. अमेरिकेत आतापर्यंत 39,015 जणांचा कोरोनामुळे मृत्यू झाला आहे. तर येथे गेल्या 24 तासांत तब्बल 1891 जणांचा मृत्यू झाला आहे. न्यूयॉर्कमध्ये शनिवारी मृतांच्या आकडा पहिल्यांदाच कमी आला येथे शनिवारी 550 जणांचा मृत्यू झाला.
इंग्लंडमध्ये कोरोनामुळे मरणारांची संख्या 15 हजार 464वर पोहोचली आहे. दिलासादायक गोष्ट ही, की येथे कोरोनामुळे अत्यवस्थ रुग्णांची संख्या कमी झाली आहे. कोरोना व्हायरसमुळे सर्वत्र चिंतेचे वातावरण निर्माण झाले आहे. जगभरात कोरोनाबाधित रुग्णांची संख्या दिवसेंदिवस वाढतच चालली आहे.
नोबेल पारितोषिक मिळालेले फ्रान्समधील प्राध्यापक लुक मोन्टाग्लिअर यांनी एका वृत्तावाहिनीला दिलेल्या मुलाखतीत सांगितले की, 'कोरोना व्हायरस एड्सवरील उपचार करण्यासाठी वॅक्सीन विकसित करण्याच्या प्रयत्नाचा परिणाम आहे. या व्हायरसच्या जीनोमध्ये असलेल्या एचआयव्ही आणि मलेरियाच्या कीटाणूंचे असणे त्याकडे इशारा करते. कोरोना व्हायरस नैसर्गिक रूपाने तयार झालेला असू शकत नाही'.