शांतीदूत बनायला गेला अन् स्वत:च तोंडावर पडला; अमेरिकेने पाकिस्ताची दोन जहाजे होर्मुझमधून हाकलली!

होर्मुजच्या सामुद्रधुनीतून जाणाऱ्या पाकिस्तानच्या दोन जहाजांना अमेरिकन सैन्याने रोखले.

एकीकडे इराण आणि अमेरिका यांच्यातील तणाव निवळण्यासाठी शांतीदूत बनण्याचा प्रयत्न करणाऱ्या पाकिस्तानला अमेरिकेने मोठा झटका दिला आहे. होर्मुझच्या सामुद्रधुनीतून जाणाऱ्या पाकिस्तानच्या दोन जहाजांना अमेरिकन नौदलाने रोखून त्यांना परत जाण्यास भाग पाडले. विशेष म्हणजे, याच मार्गावरून चीनसह इतर देशांची २० जहाजे विनासायास जात असताना केवळ पाकिस्तानलाच लक्ष्य केल्याने आंतरराष्ट्रीय वर्तुळात मोठी खळबळ उडाली आहे.

इराणने दिले होते संरक्षण, पण...

इराणने पाकिस्तानच्या २० जहाजांना होर्मुझमधून येण्या-जाण्यासाठी विशेष परवानगी दिली होती. या माध्यमातून इराणने पाकिस्तानी जहाजांच्या सुरक्षिततेची हमीही घेतली होती. पाकिस्तानने आतापर्यंत यातील चार पासेसचा वापर केला होता. मात्र, मंगळवारी जेव्हा पाकिस्तानचे दोन जहाज या मार्गावर आले, तेव्हा तिथे तैनात असलेल्या अमेरिकन सैन्याने त्यांना पुढे जाण्यास सक्त मनाई केली. अमेरिकेच्या आक्रमक पवित्र्यामुळे पाकिस्तानची ही जहाजे निमूटपणे मागे फिरली आहेत.

मध्यस्थीच्या प्रयत्नांना खीळ?

येत्या दोन दिवसांत इस्लामाबादमध्ये इराण आणि अमेरिका यांच्यात शांती करारावर चर्चा होणार आहे. यासाठी पाकिस्तान सरकार अत्यंत सक्रिय होते. अशा महत्त्वपूर्ण चर्चेच्या तोंडावरच अमेरिकेने ही कारवाई केल्याने पाकिस्तानसाठी हा मोठा कूटनैतिक धक्का मानला जात आहे. अमेरिकेने ओमानची खाडी आणि अरबी समुद्रात १० हजार सैनिक तैनात करून नाकेबंदी जाहीर केली आहे. तरीही इतर देशांच्या जहाजांना सूट आणि पाकिस्तानला बंदी, यामुळे अनेक प्रश्न उपस्थित होत आहेत.

पाकिस्तानची प्रतिक्रिया

या घटनेवर पाकिस्तान सरकारने अधिकृतपणे काहीही बोलण्यास नकार दिला असला, तरी जहाजरानी मंत्री जुनैद अनवर चौधरी यांनी कबूल केले की, पाकिस्तानला सध्या अडचणींचा सामना करावा लागत आहे. "आम्ही सतत चर्चा करत असून या समस्येवर तोडगा काढण्याचा प्रयत्न करत आहोत," असे त्यांनी सांगितले. दरम्यान, पाकिस्तानच्या जहाजरानी विभागातील एका अधिकाऱ्याने हतबलता व्यक्त करताना म्हटले की, "जेव्हा इराणने रस्ता रोखला होता तेव्हा आम्हाला इतकी काळजी नव्हती, पण आता खुद्द अमेरिकेनेच आम्हाला रोखले आहे." आता ही कोंडी फुटणार की अमेरिका पाकिस्तानची नाकेबंदी कायम ठेवणार, याकडे जगाचे लक्ष लागले आहे.