ट्रम्प आता पाकिस्तानचेही ऐकेनात, इराणला दिली उघड धमकी; म्हणाले, “करार होत नाही तोपर्यंत...”

America Iran War: इराणने अमेरिकेपुढे नमते घेतले पाहिजे. एक अनुकूल करार झाला पाहिजे, असे डोनाल्ड ट्रम्प यांनी म्हटले आहे.

America Iran War: होर्मुझची अमेरिकेने नाकेबंदी केल्यानंतर इराण आणि अमेरिकेमधील तणाव शिगेला पोहोचलेला असतानाच, अमेरिकेचे राष्ट्राध्यक्ष डोनाल्ड ट्रम्प यांनी इराणसोबतचा शांतता करार पाकिस्तानमध्ये केला जाईल, असे विधान केले. त्याचवेळी युद्धविराम पुढे वाढवण्याची शक्यता अत्यंत कमी असल्याचेही त्यांनी स्पष्ट केले. ट्रम्प यांनी उपराष्ट्राध्यक्ष जे.डी.व्हान्स पाकिस्तानकडे रवाना झाल्याचे सांगितले होते. मात्र, सोमवारी सकाळी ते व्हाइट हाऊसमध्येच असल्याचे दिसून आले. त्यामुळे ते इस्लामाबाद येथे चर्चेसाठी कधी पोहोचणार याबाबत संभ्रम कायम होता. दुसरीकडे इराणच्या संसदेचे अध्यक्ष कालिबाफ यांच्या नेतृत्वाखाली इराणचे शिष्टमंडळ मंगळवारी इस्लामाबादमध्ये पोहोचत असल्याचे समजते.

अमेरिका आणि इराण यांच्यातील युद्धविराम लवकरच संपणार आहे. या घडामोडींच्या पार्श्वभूमीवर, अमेरिकेचे अध्यक्ष डोनाल्ड ट्रम्प यांनी इराणला पुन्हा एकदा धमकी दिली आहे. जोपर्यंत इराणसोबत करार होत नाही, तोपर्यंत होर्मुझच्या सामुद्रधुनीवरील अमेरिकेची नाकेबंदी उठवली जाणार नाही, असे डोनाल्ड ट्रम्प यांनी स्पष्ट केले आहे. तसेच युद्धविराम संपेपर्यंत करार न झाल्यास, युद्धविराम संपल्यावर मोठ्या प्रमाणात बॉम्बस्फोट सुरू होतील, असा मोठा इशारा ट्रम्प यांनी दिला.

इराणने अमेरिकेपुढे नमते घेतले पाहिजे

इराणने अमेरिकेपुढे नमते घेतले पाहिजे. एक अनुकूल करार झाला तर होर्मुझवरील नाकेबंदी उठवली जाईल, असेही ट्रम्प यांनी ठामपणे सांगितले आहे. तसेच डोनाल्ड ट्रम्प यांनी पाकिस्तानी लष्करप्रमुख फील्ड मार्शल असिम मुनीर यांच्या सल्ल्याकडेही दुर्लक्ष केले आहे. दुसरीकडे सूत्रांनी दिलेल्या माहितीनुसार, असिम मुनीर यांनी ट्रम्प यांना सांगितले होते की, अमेरिकेने इराणी बंदरावर घातलेली नाकेबंदी हा वाटाघाटींमधील सर्वांत मोठा अडथळा आहे.

करार होत नाही, तोपर्यंत नाकेबंदी उठवली जाणार नाही

शत्रू गोंधळलेला आहे, कारण त्यांनाही तेच वृत्त मिळत आहे. पण त्यांना माहिती आहे की त्यांचा नौदल तळ नष्ट झाला आहे. त्यांचे हवाई दल एका अंधाऱ्या धावपट्टीवर उतरले आहे. इराणकडे क्षेपणास्त्रविरोधी किंवा विमानविरोधी उपकरणे नाहीत. त्यांच्या अनेक नेत्यांना ठार मारण्यात आले आहे. इतकेच नव्हे तर, तेथे सत्तापालट झाला आहे. सर्वात महत्त्वाचे म्हणजे, जोपर्यंत एखादा करार होत नाही, तोपर्यंत आम्ही होर्मुझच्या सामुद्रधुनीवरील नाकेबंदी उठवणार नाही, असे ट्रम्प म्हणाले. 

अमेरिकेची बाजू कमकुवत करण्यासाठी विरोधी पक्षाचे प्रयत्न

इराणबाबतची आमची मजबूत भूमिका कमकुवत करण्यासाठी विरोधी पक्ष शक्य ते सर्व काही करत आहे. पहिले महायुद्ध ४ वर्षे, ३ महिने आणि १४ दिवस चालले. दुसरे महायुद्ध ६ वर्षे आणि १ दिवस चालले, कोरियन युद्ध ३ वर्षे, १ महिना आणि २ दिवस चालले, व्हिएतनाम युद्ध १९ वर्षे, ५ महिने आणि २९ दिवस चालले आणि इराक युद्ध ८ वर्षे, ८ महिने आणि २८ दिवस चालले. तरीही ते म्हणतात की, मी ६ आठवड्यांत इराणला पराभूत करण्याचे वचन दिले होते, असे सांगत ट्रम्प यांनी विरोधकांवर टीका केली.

माझ्यावर कोणताही दबाव नाही

ट्रम्प यांनी दावा केला की, इराणच्या नेतृत्वाने शेकडो जहाजांना त्यांचे तेल अमेरिकेकडे, प्रामुख्याने टेक्सास, लुइझियाना आणि अलास्काकडे वळवण्यास भाग पाडले आहे. या नाकेबंदीमुळे इराणला दररोज ५०० दशलक्ष डॉलर्सचे नुकसान होत आहे. मी घाईने करार होऊ देणार नाही, मी बातम्यांमध्ये वाचले की माझ्यावर दबाव आहे. हे पूर्णपणे खोटे आहे. माझ्यावर कोणताही दबाव नाही. सर्वात महत्त्वाचे म्हणजे, ४७ वर्षांनंतर, आपण तेथील अव्यवस्था नेटकी करत आहोत. मागील राष्ट्राध्यक्षांनी दूरदृष्टीच्या अभावामुळे हे होऊ दिले नाही. माझ्या पहिल्या कार्यकाळात, मी स्पेस फोर्ससह आपल्या राष्ट्राचे सर्वात मोठे सैन्य तयार केले. माझ्या दुसऱ्या कार्यकाळात, मी त्याच सैन्याचा योग्य वापर करत आहे.

दरम्यान, आम्ही इराणसोबत जो करार करत आहोत तो जेसीपीओए जो सामान्यतः इराण अणुकरार म्हणून ओळखला जातो, यापेक्षा खूपच चांगला असेल. या कराराला बराक ओबामा आणि जो बायडेन यांनी मंजुरी दिली होती. आपल्या राष्ट्राच्या सुरक्षेच्या बाबतीत आतापर्यंत झालेल्या सर्वांत वाईट करारांपैकी तो एक होता. अणुशस्त्रे मिळवण्याचा तो एक निश्चित मार्ग होता, जे आताच्या आमच्या करारानुसार कधीही घडणार नाही. मी करार रद्द केला नसता, तर इस्रायलमध्ये आणि संपूर्ण मध्य-पूर्वेत, अगदी अमेरिकेच्या लष्करी तळांवरही अण्वस्त्रांचा वापर झाला असता. अकार्यक्षम आणि भ्याड नेतृत्वामुळे आम्हाला अनेक वर्षांची अपमान सहन करावा लागला, त्याऐवजी आता आम्ही इराणसोबत जो करार करणार आहोत, त्याचा संपूर्ण जगाला अभिमान वाटेल.