अमेरिकेत बर्फाळ वादळात जेटचा भीषण अपघात; टेकऑफ दरम्यान विमान उलटलं, सात जणांचा मृत्यू

US plane crash Maine 2026 अमेरिकेतील मेन राज्यामध्ये बँगोर विमानतळावर टेकऑफ दरम्यान खाजगी जेट विमान उलटले.

अमेरिकेतील 'मेन' राज्यात एका खाजगी जेट विमानाला भीषण अपघात झाल्याची धक्कादायक घटना समोर आली आहे. बँगोर आंतरराष्ट्रीय विमानतळावर रविवारी रात्री स्थानिक वेळेनुसार ७:४५ वाजता हे विमान उड्डाण करत असताना उलटले. या विमानात एकूण ८ प्रवासी आणि क्रू मेंबर्स होते. 

मिळालेल्या माहितीनुसार, 'बॉम्बार्डियर चॅलेंजर ६००' हे खाजगी जेट टेकऑफ करत असताना धावपट्टीवर उलटले. एअर ट्रॅफिक कंट्रोलच्या ऑडिओ रेकॉर्डिंगनुसार, "एक प्रवासी विमान उलटे झाले आहे," असा संदेश नियंत्रण कक्षाला देण्यात आला होता. विमान उलटल्यानंतर त्याला भीषण आग लागली.

बर्फाळ वादळाचा मोठा फटका
हा अपघात अशा वेळी घडला जेव्हा संपूर्ण अमेरिकेचा पूर्व भाग भीषण बर्फाळ वादळाचा सामना करत आहे. अपघाताच्या वेळी बँगोरमध्ये जोरदार हिमवृष्टी होत होती आणि व्हिजिबिलिटी (दृश्यमानता) अत्यंत कमी होती. खराब हवामान हे या अपघाताचे प्राथमिक कारण असल्याचे मानले जात आहे.

फेडरल एव्हिएशन ॲडमिनिस्ट्रेशन आणि नॅशनल ट्रान्सपोर्टेशन सेफ्टी बोर्डने या प्रकरणाच्या चौकशीचे आदेश दिले आहेत. हे विमान टेक्सासमधील एका प्रसिद्ध लॉ फर्मच्या नावावर नोंदणीकृत असल्याची माहिती समोर आली आहे. या अपघातानंतर बँगोर विमानतळ तात्पुरत्या स्वरूपात बंद करण्यात आले असून बचावकार्य सुरू आहे.