लोकमत न्यूज नेटवर्कहिंगोली : महावितरणच्या वतीने राज्यभरातील ग्राहकांच्या सुविधेसाठी वीजबिलावरील ग्राहकांच्या पत्त्याची दुरुस्तीसाठी अधिकृत मोबाईल नोंदणी केलेल्या ग्राहकांना एसएमएस पाठविण्यात येत आहे. त्यामुळे ग्राहकांना बिलावरील पत्त्याची दुरुस्ती करता येणे सहज सोपे झाले असून मागील दोन दिवसांत राज्यातील सुमारे ५२ हजार ग्राहकांनी या सुविधेचा लाभ घेतला आहे.
वीजबिलावरील पत्त्याची दुरुस्ती झाल्यामुळे ग्राहकांना वेळेत बिल मिळणे, योग्य वेळेत रीडिंग घेणे या प्रक्रियेत अधिक अचूकता येणार आहे. त्यामुळे ग्राहकांनाही वेळेत वीजबिल भरुन महावितरणच्या सवलतीचा लाभ घेता येणार आहे. राज्यात महावितरणचे सुमारे २ कोटी ५० लाखांपेक्षा अधिक ग्राहक आहेत. त्यापैकी १ कोटी ९५ लाख ग्राहकांनी अधिकृत मोबाईलची नोंदणी महावितरणकडे केली आहे. मोबाईलवरील एसएमएसच्या माध्यमातून ग्राहकांना विविध सुविधा उपलब्ध करुन देण्यात येत आहे. त्यामुळे जास्तीत-जास्त ग्राहकांनी आपल्या अधिकृत मोबाईल क्रमांकाची नोंदणी महावितरणकडे करण्याचे आवाहन केले आहे.
नांदेड मंडळ एकूण ग्राहक - ५५६४०७,मोबाईल नोंदणी केलेले ग्राहक - ३३९८०२, परभणी मंडळ एकूण ग्राहक- २८५७४९ तर मोबाईल नोंदणी केलेले ग्राहक- १३६६६६, हिंगोली मंडळअंतर्गत एकूण ग्राहक -१८४५६३ तसेच मो. नोंदणी केलेले ग्राहकांची संख्या - १३७०५७ अशी आहे. नांदेड परिमंडळ एकूण ग्राहकांची - १०२६७१९ संख्या आहे. तर मो. नोंदणी केलेले ग्राहक - ६१३५४३ एवढे आहेत. नांदेड परिमंडळात सर्व प्रकारच्या वर्गवारीतील वीज ग्राहकांची संख्या १० लाख २६ हजार ७१९ असून त्यापैकी ६ लाख १३ हजार ५४३ वीज ग्राहकांनी मोबाईल क्रमांक महावितरणच्या प्रणालीमध्ये नोंदवले आहेत. ज्या वीज ग्राहकांनी आपला अधिकृत मोबाईल क्रमांक महावितरणकडे नोंदविला आहे, त्यांना एसएमएस पाठविण्यात येत आहेत. या एसएमएसवरील लिंक ओपन केल्यास त्यावर ग्राहकांचा पत्ता उपलब्ध होईल. त्या पत्त्यात दुरुस्ती करण्याची सुविधा सदर लिंकद्वारे ग्राहकांना देण्यात आली आहे. यात ग्राहकांना कुठलाही आर्थिक भार सोसावा लागणार नाही.