हिंगोली : केंद्र शासनाने अंगणवाडी कर्मचाऱ्यांसाठी पोषण ट्रॅकर हे नवीन ॲप आणले आहे. यामध्ये माहिती भरणे बंधनकारक करण्यात आले आहे. मात्र, माहिती भरताना अनेक अडचणींचा सामना करावा लागत आहे. त्यामुळे अंगणवाडी कर्मचाऱ्यांच्या समस्या तत्काळ सोडवाव्यात, अशी मागणीही महाराष्ट्र राज्य अंगणवाडी कर्मचारी कृती समितीने केली आहे.
अंगणवाडीतील कामकाजाची माहिती शासनाला सहज उपलब्ध व्हावी, यासाठी मे २०२० पर्यंत कॅस या ॲपमध्ये माहिती भरावी लागत होती. परंतु, मे पासून यामध्ये तांत्रिक अडचणी निर्माण होऊ लागल्याने ते बंद पडले. आता पुन्हा केंद्र शासनाने पोषण ट्रॅकर हे ॲप आणले आहे. यामध्ये आता माहिती भरणे बंधनकारक करण्यात आले आहे. मात्र, अंगणवाडी कर्मचाऱ्यांना दिलेल्या मोबाइलमध्ये पोषण ट्रॅकर ॲप डाऊनलोड होत नाही. त्यामुळे खाजगी मोबाइलवर ॲप डाऊनलोड करण्याच्या सूचना देण्यात आल्या आहेत. अनेक कर्मचाऱ्यांकडे स्मार्ट मोबाइल उपलब्ध नाहीत. त्यामुळे माहिती भरताना अडथळा निर्माण होत आहे. डेटा रिचार्जचे पैसेही अनेक महिने येत नसून, ॲपमध्ये मराठी भाषेचा पर्याय उपलब्ध नाही. दरम्यान, लाभार्थी बालकांचा आधारकार्ड क्रमांक जोडल्याशिवाय त्यांना पूरक पोषण आहाराचा लाभ मिळणार नाही. कर्मचाऱ्यांचे मानधनही पोषण ट्रॅकरला जोडण्यात आले आहे. त्यामुळे अडचणी निर्माण होत आहेत. या संदर्भात कृती समितीने १९ मार्चला शासनाकडे निवेदन सादर केले होते. परंतु, याकडे दुर्लक्ष करण्यात आले. उलट ॲपमध्ये माहिती न भरल्यास एप्रिल महिन्याचे मानधन न देण्याची व लाभार्थींना आहार न देण्याची धमकी प्रशासनाकडून दिल्याचा आरोपही कर्मचाऱ्यांनी केला आहे. त्यामुळे शासनाने नवीन मोबाइल द्यावा, मानधन पोषण ट्रॅकरला जोडण्याचा घेतलेला निर्णय मागे घ्यावा, ॲपमध्ये सर्व व्यवहार मराठीत उपलब्ध करून द्यावेत, अशी मागणी कृती समितीने केली आहे. पोषण ट्रॅकरबाबतच्या अडचणी सुटेपर्यंत कर्मचारी शासकीय कर्तव्ये पार पाडतील. परंतु, पोषण ट्रॅकरमध्ये माहिती भरण्याचे काम न करण्याचा तसेच ५ ते ९ एप्रिलदरम्यान आंदोलन करून प्रशासनाला निवेदन देण्याचा निर्णय कृती समितीने घेतल्याची माहिती एम. ए. पाटील. शुभा शमीम, दिलीप उटाणे, कमल परुळेकर, भगवान देशमुख, सुवर्णा तळेकर, जयश्री पाटील आदींनी दिली आहे.