समाजासह ओबीसींचेही नेतृत्व करावे

संपूर्ण राज्यात विशेषत: विदर्भातील प्रत्येक जिल्ह्यात वास्तव्यास असणाऱ्या, सर्ववर्गीय कलार समाजात बहुसंख्य ...

तीर्थराज उके : विदर्भस्तरीय कोसरे कलार समाज मेळावा व परिचय संमेलनगोंदिया : संपूर्ण राज्यात विशेषत: विदर्भातील प्रत्येक जिल्ह्यात वास्तव्यास असणाऱ्या, सर्ववर्गीय कलार समाजात बहुसंख्य असणाऱ्या तसेच सामाजिक, शैक्षणिक, आर्थिक व राजकीय विकासापासून वंचित असणाऱ्या कोसरे कलार समाजाने सर्ववर्गीय कलार समाज तसेच ओबीसी प्रवर्गात मोडणाऱ्या या समाजाने समस्त ओबीसी समाजाचेही नेतृत्व करावे, असे प्रतिपादन युवा कोसरे कलार समाज संस्थेचे अध्यक्ष तीर्थराज उके यांनी केले.मामा चौक, रेल्वे डब्लिंग ग्राउंडजवळ, सिव्हिल लाईन्समधील नूतन विद्यालयाच्या प्रांगणात विदर्भस्तरीय कोसरे कलार समाज मेळावा व उपवर-वधू परिचय संमेलन पार पडले. याप्रसंगी ते बोलत होते.सदर मेळाव्यात अनेक राज्यातून पाच हजारच्या जवळपास कोसरे कलार समाजबांधवांची उपस्थिती होती. उद्घाटन मीताराम देशमुख यांच्या हस्ते, माजी आ. केशवराव मानकर यांच्या अध्यक्षतेखाली झाले. अतिथी म्हणून डॉ. कृष्णा राऊत, अलका बावणथडे, साहित्यिक राम महाजन, राजेश शहारे, फाल्गुन उके, प्रा. माधवराव उके, विजय उके, अरूण लाडे, नरेंद्र धुवारे, अनिल उके, मनोहरराव मेश्राम, रामलाल मेश्राम उपस्थित होते. उके पुढे म्हणाले, समाजाच्या इतर पोटजातीतील बांधवांनी आपसी मतभेद व उच्च-निचपणाची भावना बाजूला सारून एकत्रित, संघटीत व्हावे. सर्व क्षेत्रात प्रगतीशील राहून ज्येष्ठ नागरिकांनी आपल्या अनुभवाच्या आधारे व महिला व युवावर्गाने सर्वच क्षेत्रात पुढे नेण्यासाठी समोर यावे. समाजविकासासाठी आपले योगदान व सहकार्य द्यावे. कोसरे कलार समाजाला राजकीय विकासाच्या संधीची गरज असल्याचे ते म्हणाले.याप्रसंगी सन २०१४-१५ मध्ये दहावी, बारावी, पदवी व पदव्युत्तर अभ्यासक्रमात तसेच विविध शिष्यवृत्ती, गणित प्राविण्य परीक्षा व शालेय क्रीडा स्पर्धेत प्राविण्यप्राप्त २५ विद्यार्थी, स्पर्धा परीक्षेत यशस्वी ११ विद्यार्थ्यांच्या त्यांच्या पालकांसह सत्कार करण्यात आला. तसेच समाजाचा गौरव वाढविण्याऱ्या २५ बंधू-भगिणींचा सत्कार करण्यात आला. जवळपास १६० विवाहयोग्य उपवर-वधूंनी आपली नोंदणी करून घेतली. यानंतर महिलांचा हळदी-कुंकू कार्यक्रम व विविध विषयांवर प्रबोधन करण्यात आले.प्रास्ताविक तिर्थराज उके यांनी केले. उद्घाटन कार्यक्रमाचे संचालन सुनिंद मेश्राम व गजेंद्र बावणथडे यांनी तर आभार दिनेश फरकुंडे यांनी केले. परिचर संमेलनाचे संचालन सतीश मेश्राम, सतीश दखने व नरेंद्र धुवारे यांनी केले. आभार संतोष मेश्राम यांनी मानले.कार्यक्रमासाठी अशोक मानकर, परमेश्वर कावळे, उमाकांत शहारे, जी.बी. मेश्राम, बालू कोसरकर, मुकेश शेंडे, देवा उके, संतोष मानकर, विजय कावळे, अनिल शेंडे, राकेश शेंडे, तृप्ती दरवडे, लता मानकर, मीना मेश्राम, शोभा बन्सोड, पुष्पा लाडे, वंदना मानकर, डिंपल उके, जैयवंताबाई उके, पुष्पा सहारे, किरण दखने आदी समाजबांधव व भगिणींनी सहकार्य केले. (प्रतिनिधी)आर्थिक विकासासाठी सदस्यता मोहीमकोसरे कलार समाजाचा आर्थिक विकास करण्याच्या दृष्टीने व संस्थेच्या संकल्पनेतून समाजाची नियोजित राजराजेश्वर सहस्त्रार्जुन क्रेडिट को-आॅपरेटिव्ह सोसायटी या नावे निर्माण होणाऱ्या कोसरे कलार समाजाच्या पतसंस्थेच्या सदस्यता मोहिमेचा शुभारंभ करण्यात आला.