एसटी कर्मचाऱ्यांचे स्थानकावर आंदोलन

केंद्र शासनाच्या प्रस्तावित रस्ता वाहतूक व सेप्टी बिल २०१४ च्या नवीन कायद्यामुळे एसटीच्या परिचालनात अनेक बाधा व समस्या निर्माण होतात.

गोंदिया : केंद्र शासनाच्या प्रस्तावित रस्ता वाहतूक व सेप्टी बिल २०१४ च्या नवीन कायद्यामुळे एसटीच्या परिचालनात अनेक बाधा व समस्या निर्माण होतात. याचा संपूर्ण महाराष्ट्रात ट्रान्सपोर्ट संघटनेच्या वतीने निषेध करण्यात आला. गुरुवारी १८ डिसेंबर रोजी गोंदियाच्या बस स्थानकावर एसटीच्या कर्मचाऱ्यांनीसुद्धा निषेध नोंदवून आंदोलन केले.
सदर आंदोलनात एसटीच्या कर्मचाऱ्यांनी गोंदिया बस स्थानकावर आपल्या हातात फलक व झेंडे घेवून नवीन कायद्यात प्रस्तावित बदलास घेवून विरोध दर्शविला. त्यांनी आपल्या मागण्यांवर शासनाने लक्ष देण्याची मागणी केली. त्यांच्या मागण्यांमध्ये खासगी वाहनांना बस स्थानकावर उभे करून प्रवाशी भरणाऱ्या वाहनांना क्रमवार परवाना देवू नये, निविदा पद्धतीने प्रवासी वाहन चालविण्याचा परवाना घेणाऱ्यांवर रोक लावावे, रस्त्यांवर वाहतूक व सुरक्षा बिल २०१४ मध्ये एसटीवर लादण्यात आलेल्या अनेक मारक कलमांना रद्द करावे, प्रवाशांच्या सेवेसाठी एसटीच्या बसांचा विस्तार करावा व एसटीच्या विकासासाठी सहकार्य करावे, नवीन बसेसचा पुरवठा करावा आदी मागण्यांना घेवून एक दिवशीय आंदोलन करण्यात आले.
आंदोलनाबाबत सांगण्यात आले की एसटी महामंडळ मोठ्या आर्थिक समस्येशी लढत आहे. महामंडळाकडे शासन लक्ष देत नसल्यामुळे एसटीची स्थिती दिवसेंदिवस वाईट होत आहे. तसेच नवीन कायदा लागू झाल्यास कर्मचाऱ्यांवर त्याचा काय प्रभाव पडेल, याची कल्पनासुद्धा कर्मचाऱ्यांना नाही. अशात राज्यभरात एसटी महामंडळाच्या बस स्थानकात नवीन बसेसची मागणी असल्यावरही फेऱ्यांसाठी बसेस उपलब्ध नाहीत. या संदर्भात शासनाशी वेळोवेळी पत्र व्यवहारसुद्धा करण्यात आला. मात्र कोणत्याही लोकप्रतिनिधीने ही बाब उचलून धरली नाही व शासनानेसुद्धा लक्ष दिले नाही. अशात केंद्र शासनाच्या रोड ट्रान्सपोर्ट व सेफ्टी बिल २०१४ नवीन प्रस्तावित कायद्यात बदल झाल्याने याचा सर्वाधिक प्रभाव एसटी महामंडळावर पडणार आहे. तरीसुद्धा शासनाला याचे काही देणे-घेणे नाही.
या संदर्भात महामंडळावर होणारा केंद्र शासनाच्या नवीन कायद्याचा प्रतिकूल प्रभाव पाहता, या मुद्याला हिवाळी अधिवेशनात अनेक लोकप्रतिनिधींच्या माध्यमातून उचलण्याचा प्रयत्न करण्यात आला. याबाबत संघटनेचे एक प्रतिनिधी मंडळ दिल्लीला गेल्याची माहितीसुद्धा मिळाली आहे. (प्रतिनिधी)