पुलावरील खड्डा देतो अपघाताला आमंत्रण

परिसरातील सितेपार ते शिकारीटोला या मार्गावर सार्वजनिक बांधकाम विभागांतर्गत पुलाचे बांधकाम करण्यात आले आहे. मात्र या पुलावर मोठा खड्डा पडला असून येथून ये-जा करणाऱ्यांना अपघाताचे आमंत्रण देत आहे.

पांढरी : परिसरातील सितेपार ते शिकारीटोला या मार्गावर सार्वजनिक बांधकाम विभागांतर्गत पुलाचे बांधकाम करण्यात आले आहे. मात्र या पुलावर मोठा खड्डा पडला असून येथून ये-जा करणाऱ्यांना अपघाताचे आमंत्रण देत आहे. लोकांच्या जीवासाठी धोकादायक ठरत असलेल्या खड्ड्याला दुरूस्तीची गरज आहे.
परिसरातील गावांना एकमेकांशी जोडणारा हा मुख्य मार्ग असल्याने या मार्गावर दिवस-रात्र वाहतूक सुरू राहते. सततच्या वाहतुकीमुळे या मार्गावर असलेल्या पुलाची स्थिती जर्जर झाली होती. यामुळेच या मार्गावरील पुलाचे बांधकाम करण्यात आले. मात्र सार्वजनिक बांधकाम विभागाचा निष्काळजी कारभार या बांधकामातून दिसून आला.
त्यामुळे या पुलावर मधोमध व रस्त्याच्या कडेला खड्डा पडला. या खड्ड्यामुळे वाहतूकीत नागरिकांना अडचण होत असल्याने नागरिकांनी याची तक्रार उपविभागीय कार्यालय सडक/अर्जुनी येथील अभियंता सी.जे. अगळे यांना दिली. मात्र अजुनपर्यंत यावर कारवाई तर सोडाच साधी चौकशीही करण्यात आल्याचे ऐकिवात नाही.
यावर गावकऱ्यांनी मुरुम आणून पुलावरील खड्डा भरला व रस्त्याच्या कडेचा खड्डा मात्र तसाच आहे. तरी वरिष्ठांनी याची चौकशी करुन दोषींवर कारवाई करण्याची. तसेच पुलाची दुरुस्ती करावी अशी परिसरातील नागरिक करीत आहेत. (वार्ताहर)