धानपिकाला द्या प्रोत्साहन अनुदान

धान पिकाला उत्पादन खर्चावर आधारित किमान २ हजार रुपये प्रतीक्विंटल हमीभाव किंवा एकरी ३ हजार रुपये प्रोत्साहन अनुदान द्यावे या प्रमुख मागण्यांसह धान उत्पादन शेतकऱ्यांच्या विविध मागण्यांचे

गोंदिया : धान पिकाला उत्पादन खर्चावर आधारित किमान २ हजार रुपये प्रतीक्विंटल हमीभाव किंवा एकरी ३ हजार रुपये प्रोत्साहन अनुदान द्यावे या प्रमुख मागण्यांसह धान उत्पादन शेतकऱ्यांच्या विविध मागण्यांचे निवेदन केंद्रीय मंत्री नितीन गडकरी व राज्याचे वित्तमंत्री सुधीर मुनगंटीवार यांना जिल्हा भाजपाकडून देण्यात आले. या निवेदनाची प्रत केंद्रीय कृषीमंत्री राधामोहन सिंह यांनाही पाठविण्यात आली.
निवेदनात केलेल्या मागणीनुसार गेल्या काही वर्षापासून जिल्ह्यातील धान उत्पादक शेतकऱ्यांना अवर्षणाचा सामना करावा लागत आहे. त्यातच धान पिकाला उत्पादन खर्चाच्या तुलनेत भाव मिळत नसल्याने कर्जाच्या जाचापोटी त्यांना आत्महत्येचा मार्ग पत्करावा लागत आहे. त्यामुळे धानपिकाला २ हजार रुपयेप्रती क्विंटल हमीभाव किंवा शेतकऱ्यांला वर्तमान शासन निर्धारीत भाव कमी असल्याने होणाऱ्या नुकसानीच्या मोबदल्यात यावर्षी एकरी ३ हजार रुपये उत्पादन प्रोत्साहन अनुदान देण्यात यावे अशी मागणी करण्यात आली. तसेच शेतातच सिंचनाची व्यवस्था, १०० टक्के अनुदानावर ट्युबवेल देण्यात यावे, कृषी पंपासाठी वेगळा वीजपुरवठा देवून भारनियमन बंद करण्यात यावे, शेतीसाठी ७४ टक्के अनुदानावर सोलर पंप देण्यात यावे, ठिंबक व तुषार जल सिंचन योजना ७५ टक्के अनुदानावर देण्यात यावे, बागायती शेतीसाठी शेडनेट व इतर साधन समग्री ७५ टक्के अनुदानावर देवून त्याचा विमा काढण्यात यावा, शेतीपुरक व्यवसायासाठी ५० टक्केदान देण्यात यावे, ट्रॅक्टर, थ्रेसर, हार्वेस्टर, ७५ टक्के अनुदानावर देण्यात यावे. गोदामाकरीता ५० टक्के अनुदान देण्यात यावे, कृषी प्रक्रिया उद्योगाला ५० टक्के अनुदान देण्यात यावे, या मागण्यांचा समावेश निवेदनात आहे.
निवेदन देताना भाजप जिल्हाध्यक्ष विनोद अग्रवाल, आ.राजकुमार बडोले, आ.विजय रहांगडाले, आ.भेरसिंग नागपुरे, दयाराम कापगते, हेमंत पटले, भाऊराव उके, जयंत शुक्ला, दिलीप चौधरी, झामसिंग येरणे, लक्ष्मण भगत उपस्थित होते. (जिल्हा प्रतिनिधी)