आयुर्वेदातून आरोग्यसेवेची नवी दिशा: मुख्यमंत्री प्रमोद सावंत

हेल्थ विथ आयुर्वेद उपक्रमाचा प्रारंभ, वाढदिवसानिमित्त लोकांकडून शुभेच्छा

लोकमत न्यूज नेटवर्क, डिचोली : आयुर्वेदाच्या माध्यमातून राज्यातील आरोग्य सेवा अधिक सक्षम करण्याच्या उद्देशाने 'हेल्थ विथ आयुर्वेद चेक्ड बाय डॉक्टर २.०' हा विशेष आरोग्य उपक्रम उत्साहात पार पडला. या बहुविशेषज्ञ (मल्टिस्पेशालिटी) आयुर्वेदिक आरोग्य तपासणी शिबिराचे उद्घाटन मुख्यमंत्री डॉ प्रमोद सावंत, आरोग्यमंत्री विश्वजीत राणे यांच्या हस्ते करण्यात आले. मोफत आयुर्वेद टेलिकन्सल्टेशनसाठीच्या पोर्टलचे उद्घाटन करण्यात आले. आयुष डॉक्टरांची उपलब्धता वाढविणे आणि सिंगल विंडो सिस्टीमद्वारे विविध आरोग्यसेवा उपलब्ध करून देण्याचे काम सुरू असल्याचे त्यांनी नमूद केले.

गोवा कॉलेज ऑफ नॅचरोपथी व हरवळेतील योगिक सायन्स महाविद्यालयात हा कार्यक्रम उत्साहात झाला. शिबिरामध्ये नागरिकांना विविध आयुर्वेद तज्ज्ञांकडून मोफत आरोग्य तपासणी, सल्ला आणि उपचार सुविधा उपलब्ध करून देण्यात आल्या. पचनसंस्था विकार, सांधेदुखी, त्वचारोग, ताण-तणाव आदी आजारांवर आयुर्वेदिक उपचार, मार्गदर्शन देण्यात आले.

सर्व मतदार संघात शिबिर

मुख्यमंत्री सावंत यांनी आयुर्वेद ही भारताची प्राचीन व प्रभावी वैद्यकीय परंपरा असून ती आधुनिक जीवनशैलीतही अत्यंत उपयुक्त असल्याचे सांगितले. ते म्हणाले की, 'राज्यातील सर्व ४० मतदारसंघांमध्ये अशा प्रकारचे एकात्मिक आरोग्य शिबिर आयोजित करून नागरिकांना उत्तम आरोग्य सुविधा देण्याचा सरकारचा मानस आहे. वाढत्या कॅन्सर, मधुमेह व डायलेसिस रुग्णसंख्या ही चिंतेची बाब असल्याचे ते म्हणाले.

शिबिराला नागरिकांचा उत्स्फूर्त प्रतिसाद मिळाला. नागरिकांनी मोठ्या संख्येने आरोग्य तपासणीचा लाभ घेतला. कार्यक्रमाला डॉ. सुजाता कदम, निलेश कोरडे, मिताली जोशी, पांडुरंग कुट्टीकर, संतोष मळीक, डॉ. स्नेहा भागवत व डॉक्टरांची टीम उपस्थित होती.

विद्यार्थ्यांकडून शुभेच्छा...

येथील प्रोग्रेस हायस्कूलमध्ये मुख्यमंत्री सावंत यांनी विद्यार्थ्यांना मार्गदर्शन करीत त्यांच्यासोबत वाढदिवस साजरा केला. वाढदिवसाचा केक कापण्यात आला. रवींद्र भवनात डॉ. सावंत यांच्या वाढदिवसानिमित्त रांगोळी, चित्रकला प्रदर्शन आयोजित करण्यात आले होते. राज्याच्या विविध भागातून आलेल्या लोकांनी सावंत यांना शुभेच्छा दिल्या.

आरोग्य, शिक्षण क्षेत्रात मोठे परिवर्तन : राणे

आरोग्यमंत्री राणे यांनी सांगितले की, 'अशा उपक्रमांमुळे नागरिकांमध्ये आरोग्याबाबत जागरूकता वाढण्यास मदत होईल आणि आयुर्वेदिक उपचार पद्धतीवरील विश्वास अधिक दृढ होईल.

गेल्या आठ वर्षांत राज्यातील आरोग्य व शिक्षण क्षेत्रात मोठे परिवर्तन घडवून आणण्यात आले आहे. रोजगारनिर्मितीवरही भर देण्यात आला आहे. मुख्यमंत्री डॉ. प्रमोद सावंत यांनी सात वर्षांत चांगले कार्य केले. रोजगाराभिमुख शिक्षणावर भर दिला. पुढील काळातही अशाच प्रकारे राज्याच्या सर्वांगीण विकासासाठी प्रयत्न सुरू राहतील.'

यावेळी आगामी निवडणुकीतही डॉ. प्रमोद सावंत यांच्या मार्गदर्शनाखाली राज्यात सरकार स्थापन करण्यासाठी सर्वांनी योगदान द्यावे असे आवाहन त्यांनी केले.