मारहाण करणाऱ्यांवर कारवाई करा

धानोरा तालुक्यातील मिचगाव (खुर्द) येथील श्रीराम फटींग, बंटी फटींग, गोलू फटींग, किरण फटींग, मंगला फटींग ...

कडुकर कुटुंबीयांची मागणी : तक्रार घेण्यास पोलिसांचा नकार
गडचिरोली : धानोरा तालुक्यातील मिचगाव (खुर्द) येथील श्रीराम फटींग, बंटी फटींग, गोलू फटींग, किरण फटींग, मंगला फटींग व अनंता फटींग या सहा जणांनी वाद घालून विलास पांडुरंग कडुकर, पंकज विलास कडुकर, गणेश विलास कडुकर व पल्लवी भाऊराव कडुकर या चौघांना बेदम मारहाण केली. हे चारहीजण जिल्हा सामान्य रुग्णालयात उपचार घेत आहेत. या घटनेसंदर्भात तक्रार देण्यासाठी गेलो असता, गडचिरोली व चातगाव पोलिसांनी तक्रार स्वीकारण्यास नकार दिला. त्यामुळे या प्रकरणाची सखोल चौकशी करून कडुकर कुटुंबीयांना मारहाण करणाऱ्या फटींग कुटुंबीयातील सहा जणांवर गुन्हे दाखल करून कठोर कारवाई करण्यात यावी, अशी मागणी प्रेमलाल पांडुरंग कडुकर व सुधाकर पांडुरंग कडुकर यांनी मंगळवारी गडचिरोली येथे आयोजित पत्रकार परिषदेत केली.
यावेळी माहिती देताना प्रेमलाल कडुकर म्हणाले, विलास कडुकर व श्रीराम फटींग यांचे घर शेजारी आहे. दोन्ही घराच्या मदात रस्ता आहे. श्रीराम फटींग हे आपल्या शेळ्या कडुकर यांच्या घरालगत असलेल्या संरक्षण कुंपालगत रिकाम्या जागेत नेहमी बांधत असतात. घटनेच्या दिवशी ५ जुलैला रविवारी सायंकाळी ५.३० ते ६ वाजताच्या सुमारास शेळी हाकलल्याच्या कारणावरून फटींग कुटुंबीयांनी कडुकर कुटुंबीयांशी वाद घातला. दरम्यान कडुकर कुटुंबीयातील चौघांना बेदम मारहाण करून जखमी केले. त्यानंतर कडुकर यांचे नातेवाईक आनंदराव कावळे यांना भ्रमणध्वनीवरून माहिती मिळाल्यानंतर त्यांनी सर्व जखमींना गडचिरोलीच्या रुग्णालयात दाखल केले.
रुग्णालय पोलीस चौकीतील एका पोलीस शिपायाने सर्व जखमींचे बयाण घेतले व त्याने गडचिरोली शहर पोलीस ठाण्यात जाऊन तक्रार देण्यास आम्हाला सांगितले. त्यानुसार आम्ही चार ते पाच नातेवाईक मिळून रात्री १०.३० वाजताच्या सुमारास गडचिरोली पोलीस ठाण्यात गेलो. यावेळी तेथील पोलीस उपनिरीक्षक गांगुर्डे यांच्याशी चर्चा झाली. त्यांनी चातगाव पोलीस मदत केंद्रात तक्रार देण्यास सांगितले. मात्र चातगाव पोलिसांनी आमची तक्रार घेतली नाही, असा आरोपही प्रेमलाल कडुकर यांनी केला. (स्थानिक प्रतिनिधी)