लाेकमत प्रतिनिधीने साेमवारी (दि.११) विद्युत कारागिरासह जिल्हा रुग्णालयाला भेट देऊन विद्युत फिटिंगवर नजर मारली. त्यात अनेक ठिकाणी विद्युत फिटिंगमधील त्रुटी नजरेस पडल्या. जिल्हा रुग्णालयाला माेठ्या प्रमाणात विजेची आवश्यकता भासत असल्याने, या रुग्णालयासाठी स्वतंत्र डीपी बसविण्यात आली आहे. डीपीवरून रुग्णालयाला वीजपुरवठा करण्यात आला आहे. वाॅर्डांमध्ये वीजपुरवठा करण्यासाठी एमसीबी बसविण्यात आल्या आहेत. मात्र, यातील बहुतांश एमसीबी बाॅक्स उघडेच आहेत. एका एमसीबी बाॅक्समध्ये ५० पेक्षा अधिक स्वीच आहेत. त्यांना शेकडाे वायर जाेडण्यात आले आहेत. या एमसीबी बाॅक्सला झाकण नसल्याने सर्व वायर उघड्या पडल्याचे दिसून येते.
एका वाॅर्डातून दुसऱ्या वाॅर्डात वीज केबल टाकण्यात आले आहेत. काही केबल प्लास्टिक पाईपमध्ये सुरक्षित आहेत. काही ठिकाणी विस्तारित वीज पुरवठा करण्यासाठी टाकलेले केबल मात्र पाईपशिवाय आहेत. अनेक वर्षांपासून विद्युत दुरुस्ती झाली नसल्याने पाईपसह काही केबल लाेंबकळत असल्याचे दिसून येते. काही ठिकाणी एका केबलला दुसरा केबल जाेडण्यात आला आहे. वायर जाेडतेवेळी चिकटपट्टी निघून गेली आहे. त्यामुळे धाेका हाेण्याची शक्यता नाकारता येत नाही. वेळीच दुरुस्ती हाेणे आवश्यक आहे.
बाॅक्स ..
‘सीएस’च्या केबीनसमोरच वायरचे जाळे
जिल्हा शल्यचिकित्सक, अतिरिक्त जिल्हा शल्यचिकित्सक, निवासी वैद्यकीय अधिकारी बसत असलेल्या खाेल्यांच्या समाेरच एमसीबी बाॅक्स बसविण्यात आला आहे. हा एमसीबी बाॅक्स पूर्णपणे उघडा आहे. त्यामुळे एमसीबी बाॅक्समधील वायर लाेंबकळत असल्याचे दिसून येते. रुग्णालयातील प्रमुख प्रशासकीय अधिकाऱ्यांच्या कक्षांसमाेरच ही स्थिती असेल तर जिल्हा रुग्णालयातील इतर वाॅर्डांमधील विद्युत फिटिंगचा अंदाज येण्यास मदत हाेते.
बाॅक्स ....
अनेक वर्षांपासून इलेक्ट्रिक ऑडिट नाही
फायर ऑडिटप्रमाणेच दर दाेन वर्षांनी इलेक्ट्रिक ऑडिट हाेणे आवश्यक आहे. मात्र, रुग्णालयातील विद्युत फिटिंगची सध्याची स्थिती लक्षात घेतली तर मागील अनेक वर्षांपासून इलेक्ट्रिक ऑडिट झाले नसल्याचे दिसून येत आहे. इलेक्ट्रिक ऑडिट झाले किंवा नाही, याबाबत विचारणा करण्यासाठी जिल्हा शल्यचिकित्सकांशी संपर्क करण्याचा प्रयत्न केला, मात्र संपर्क होऊ शकला नाही.
बाॅक्स .....
मुख्य दरवाजाला लागूनच अनेक वायर
मुख्य दरवाजातून आंतररुग्ण विभागात जाताना असलेल्या मुख्य दरवाजाला लागूनच अनेक वायर आहेत. हे वायर अगदी उघडे आहेत. यातील एखाद्या वायरचे वरचे आवरण निघून दरवाजाच्या लाेखंडी राॅडला स्पर्श झाल्यास विद्युत प्रवाहित हाेऊन जीवितहानी हाेण्याची शक्यता नाकारता येत नाही.
बाॅक्स ...
बांधकामे झाली, मात्र विद्युत फिटिंगकडे दुर्लक्ष
मागील दाेन वर्षांपासून जिल्हा रुग्णालयात काेट्यवधी रुपयांचे बांधकाम केले जात आहे. अनेक वाॅर्डांची दुरुस्ती करण्यात आली आहे. काही वाॅर्ड खासगी रुग्णालयांप्रमाणे चकाचक झाले आहेत. तसेच नवीन इमारत झाल्याने जिल्हा रुग्णालयाच्या मुख्य इमारतीवरील भार कमी झाला आहे. मात्र जुन्या इमारतीमधील विद्युत फिटिंगच्या दुरुस्तीकडे दुर्लक्ष झाले असल्याचे दिसून येते.