राकाँही न.प.च्या सत्तेत

२०११ च्या डिसेंबरमध्ये गडचिरोली नगर पालिकेवर एकहाती सत्ता मिळविणाऱ्या युवाशक्ती आघाडीने यावेळी सभापती पदाच्या निवडणुकीत राष्ट्रवादी काँग्रेसच्या बंडखोर गटाला सत्तेत सहभाग

गडचिरोली : २०११ च्या डिसेंबरमध्ये गडचिरोली नगर पालिकेवर एकहाती सत्ता मिळविणाऱ्या युवाशक्ती आघाडीने यावेळी सभापती पदाच्या निवडणुकीत राष्ट्रवादी काँग्रेसच्या बंडखोर गटाला सत्तेत सहभाग दिल्याचे आजच्या निवडणुकीतील समिकरणावरून दिसून आले आहे.
राष्ट्रवादी काँग्रेसच्या अतुल गण्यारपवार गटाचे गोकुलनगर वार्डातील नगरसेवक विजय गोरडवार यांना नियोजन आणि विकास या समितीचे सभापती पद देण्यात आले. राष्ट्रवादी काँग्रेसचे ५ सदस्य आहेत. त्या बळावर सत्ताधाऱ्यांनी हे सभापती पद गोरडवारांना दिले. सार्वजनिक बांधकाम विषय समितीच्या सभापती पदी पुन्हा आनंद श्रृंगारपवार यांना संधी देण्यात आली. शिक्षण व सांस्कृतिक समितीच्या सभापती पदावर सचिन काशिनाथ बोबाटे हे कायम राहिले आहे. स्वच्छता व आरोग्य समितीच्या सभापतीपदी डॉ. अश्वीनी सुधिर धात्रक, पाणी पुरवठा समितीच्या सभापती पदी संजय गोपाळराव मेश्राम, महिला व बालकल्याण समितीच्या सभापती पदी शारदा दामले या जुन्याच चेहऱ्यांना संधी देण्यात आली आहे. गेल्यावेळी नियोजन व विकास समितीचे सभापती पद भाजपच्या बेबीताई चिचघरे यांच्याकडे होते. त्यांच्याऐवजी आता राकाँच्या गण्यारपवार गटाचे विजय गोरडवार यांना संधी देण्यात आली आहे. भाजपला डच्चू या निवडणुकीत मिळालेला आहे. सभापती पदाच्या निवडणुकीसाठी गडचिरोली येथे आज बैठक पार पडली. २३ व २ स्विकृत नगरसेवक असे २५ सदस्य असलेल्या पालिकेत बैठकीसाठी केवळ २१ नगरसेवक हजर होते. बैठकीला काँग्रेसच्या पुष्पा कुमरे, सत्ताधारी युवाशक्ती आघाडीच्या चेतना ठाकरे, अपक्ष माधुरी खोब्रागडे व राकाँचे ज्येष्ठ नगर सेवक सुरेश पोरेड्डीवार हे गैरहजर होते. निवडणुक निर्णय अधिकारी तथा पिठासीन अधिकारी म्हणून उपविभागीय अधिकारी पी. शिवशंकर यांनी काम पाहिले. यावेळी मुख्याधिकारी गिरीष बन्नोरे, के. एन. येरगुडे, बी. एम. शेंडे आदी उपस्थित होते. राष्ट्रवादी काँग्रेस पक्षाने गेल्या अनेक दिवसांपासून पक्षाच्या नेत्यांशी फारकत घेतल्याने गण्यारपवार गटाच्या गोरडवारांना यावेळी संधी मिळाली आहे. (स्थानिक प्रतिनिधी)