मार्र्कं डा होणार हागणदारीमुक्त

विदर्भाची काशी म्हणून प्रसिद्ध असलेले मार्कंडादेव हे गाव हागणदारीमुक्त करण्याचा निर्णय महात्मा गांधी तंटामुक्त समितीच्या सोमवारी पार पडलेल्या बैठकीमध्ये घेण्यात आला.

दारूविक्रीलाही बंदी : तंटामुक्त समितीच्या सभेत ठरावमार्र्कं डादेव : विदर्भाची काशी म्हणून प्रसिद्ध असलेले मार्कंडादेव हे गाव हागणदारीमुक्त करण्याचा निर्णय महात्मा गांधी तंटामुक्त समितीच्या सोमवारी पार पडलेल्या बैठकीमध्ये घेण्यात आला. तंटामुक्त समितीची सभा ग्रामपंचायत भवनात पार पडली. यावेळी गावाच्या विकासाबाबत विविध ठराव घेण्यात आले. मागील काही महिन्यांपासून मार्कंडादेव येथे खुलेआम दारूची विक्री केली जात आहे. गावातच दारू मिळत असल्याने गावातील लहान मुले, युवकसुद्धा दारूच्या आहारी गेले आहेत. दिवसभर काम केलेल्या मजुरीतील बराचसा पैसा केवळ दारूवर खर्च होत असल्याने अनेक कुटुंब आर्थिक संकटात सापडली आहेत. दारूमुळे गावाची शांतता धोक्यात आली आहे. संपूर्ण देशात मार्कंडादेव हे गाव विदर्भाची काशी म्हणून ओळख आहे. मात्र गावात सुरू असलेली अवैध दारूविक्री ही अत्यंत लाजीरवाणी बाब असल्याचे लक्षात आल्यानंतर तंटामुक्त समितीने अवैध दारूविक्रीच्या विरोधात कडक पावले उचलली आहेत. यामध्ये जो व्यक्ती दारू विकतांना आढळून आल्यास त्याच्यावर ३ हजार ५०१ रूपयांचे दंड ठोठावण्यात येईल, त्याचबरोबर दारूविक्रीसंदर्भात माहिती देणाऱ्यास २५१ रूपयांचे बक्षीस देण्यात येईल. त्याचबरोबर दारू पिऊन येणाऱ्या नागरिक किंवा भाविकास मार्कंडादेव गावामध्ये प्रवेशबंदी केली जाणार असल्याचा ठराव मंजूर करण्यात आला. मार्कंडादेव गाव हागणदारीमुक्त करण्याच्या उद्देशानेसुद्धा या सभेतसुद्धा चर्चा करण्यात आली. उघड्यावर शौचास केल्यामुळे अनेक रोगांचा प्रसार होतो. त्याचबरोबर महिलांचे आरोग्यसुद्धा बिघण्याची शक्यता आहे. त्यामुळे नागरिकांनी बाहेर शौचास करू नये याबाबत अनेकदा बजाविण्यात आले असले तरी याचे पालन करण्यात आले नाही. त्यामुळे बाहेर शौचास बसणाऱ्या व्यक्तीकडून ५०० रूपयांचा दंड वसूल केल्या जाईल, असा निर्णय घेण्यात आला. सभेला अध्यक्षस्थानी तंटामुक्त समितीचे अध्यक्ष प्रकाश आभारे, सरपंच ललिता मरसकोल्हे, उपसरपंच सेविकांत आभारे, ग्रामपंचायत सदस्य राजू शेंडे, योगीता मरसकोल्हे, ग्रामसेवक सराटे, मुख्याध्यापक शेंडे, प्रा. संतोष सुरपाम, थामदेव आत्राम, सुरेश बंडावार, मधुकर झाडे, मधू कुलसंगे, विठाबाई गेडाम, भगवान शेंडे, रमेश कोडापे, नारायण राऊत, पोलीस पाटील परमात्मा शेंडे, एकनाथ कुनघाडकर, विठ्ठल सरपे, देवानंद सुरपाम आदी उपस्थित होते. पहिल्यांदाच तंटामुक्त समितीने दारू विक्रेत्यांवर आर्थिक दंड ठोठाविण्याचा निर्णय घेतला आहे. त्यामुळे गावात दारूविक्री करणाऱ्याचे धाबे दणाणले आहेत. या दोनही निर्णयांची कडक अंमलबजावणी करण्याचा निर्धार सदस्यांनी केला आहे. (वार्ताहर)