गडचिरोली, चामोर्शी, अहेरी, आरमोरी आदी तालुक्यानंतर वडसा, धानोरा, कुरखेडा तालुक्यात सुद्धा लस टप्प्याटप्याने वितरण करून लस देण्यास सुरुवात झाली आहे. मात्र कोरची तालुक्यात आलेली लस साठवणूक उपकरणाअभावी परत पाठविण्यात आली. त्यामुळे आणखी किती दिवस येथील आरोग्य कर्मचाऱ्यांना कोविड लसीपासून वंचित राहावे लागेल? असा प्रश्न येथील आरोग्य कर्मचाऱ्यांना पडलेला आहे.
२३ जानेवारीला कोविड लस ठेवण्यासाठी शीत साठवणूक उपकरण जिल्हास्तरावरून कोरची तालुक्यातील रुग्णालयात पाठविण्यात आले होते. परंतु कोरची ग्रामीण रुग्णालयात लस साठवणुकीची व्यवस्था नसल्याने हे उपकरण रुग्णालय प्रशासनाने जिल्हास्तरावर परत पाठविले. कोरची ग्रामीण रुग्णालय नेहमीच ढिसाळ नियाेजनामुळे चर्चेत असते. येथील ग्रामीण रुग्णालयात स्थायी वैद्यकीय अधीक्षक नसून गडचिरोलीत राहत असलेल्या डॉ. बागराज धुर्वे यांच्याकडे सध्या प्रभार दिलेला आहे. परंतु पूर्ण वेळ वैद्यकीय अधीक्षक नसल्याने येथील कारभार वाऱ्यावर आहे. स्थायी वैद्यकीय अधीक्षक असल्यास आरोग्य सेवा सुरळीत होऊन रुग्णांना याेग्य सेवा मिळेल. मात्र ढिसाळ नियाेजनाचा फटका रुग्णांना बसत आहे.
बाॅक्स
काेरची तालुक्यात ३००वर आराेग्य कर्मचारी
तालुक्यातील आरोग्य विभागात दोन आरोग्य केंद्र, तीन पथक, एकवीस प्राथमिक उपकेंद्र असून यामध्ये जवळपास ३०० च्यावर आरोग्य कर्मचारी कार्यरत आहेत. कोरोनाच्या काळात याच आरोग्य कर्मचारी, आरोग्य सेविका, आशावर्कर आदींनी कोरोनाची भीती न बाळगता तालुक्यात आरोग्य सेवा दिलेली आहे. मात्र यांनाच कोविड लस मिळत नसल्याने गंभीर प्रश्न निर्माण झालेला आहे.
काेट...
लस साठवणूक व वितरणाची सर्व व्यवस्था ग्रामीण रुग्णालयाकडे असल्याने नेमके आणखी किती दिवस वेळ लागेल, हे सांगता येणार नाही किंवा याबाबत कोरची ग्रामीण रुग्णालयातून कुठलाही संदेश आलेला नाही.
विनाेद मडावी, तालुका आराेग्य अधिकारी काेरची
काेट...
सध्या कुठल्याही लसीसाठी शीत उपकरण पाठवण्यात आलेले नाही. शीत साखळी उपकरण जिल्हा आरोग्य अधिकारी यांनी पाठविल्याने ग्रामीण रुग्णालयात उतरविण्यात आलेले नाही. तसेच ग्रामीण रुग्णालयात आवश्यक प्रमाणात शीत उपकरणे आहेत. दिल्लीच्या पोर्टलवर जोपर्यंत कोरची तालुक्याचे नाव येणार नाही तोपर्यंत लसीची साठवणूक व वितरण करता येणार नाही.
डाॅ. बागराज धुर्वे, प्रभारी वैद्यकीय अधीक्षक ग्रामीण रुग्णालय काेरची