गोंडवाना विद्यापीठात पदवी व पदव्युत्तर अभ्यासक्रमाच्या १० टक्के जागा वाढणार

चंद्रपूर, गडचिरोली या दोन जिल्ह्याच्या शैक्षणिक विकासासाठी स्थापन करण्यात आलेल्या गोंडवाना विद्यापीठात यावर्षी पदवी ...

निवेदन : चंद्रपूर एनएसयूआयच्या मागणीनंतर विद्यापीठ प्रशासनाचा निर्णय
गडचिरोली : चंद्रपूर, गडचिरोली या दोन जिल्ह्याच्या शैक्षणिक विकासासाठी स्थापन करण्यात आलेल्या गोंडवाना विद्यापीठात यावर्षी पदवी व पदव्युत्तर अभ्यासक्रमाच्या प्रवेशापासून अनेक विद्यार्थी वंचित राहिले होते. याबाबीची दखल घेऊन चंद्रपूर जिल्हा एनएसयूआयच्या पदाधिकाऱ्यांनी गुरूवारी गोंडवाना विद्यापीठावर धडक देऊन विद्यापीठाअंतर्गत अभ्यासक्रमाच्या १० टक्के जागा वाढविण्याचा निर्णय विद्यापीठ प्रशासनाला घेण्यास भाग पाडले.
एनएसयूआयच्या पदाधिकाऱ्यांनी कुशल पुगलिया यांच्या नेतृत्त्वात गोंडवाना विद्यापीठावर धडक देऊन चंद्रपूरसह गडचिरोली जिल्ह्यातील महाविद्यालयांमध्ये पदवी व पदव्युत्तर अभ्यासक्रमाच्या जागा वाढविण्याची मागणी केली. यावेळी विद्यापीठाचे बीसीयूडीचे प्रभारी संचालक डॉ. एस. एम. रोकडे यांनी एनएसयूआयच्या शिष्टमंडळाशी चर्चा करून या अभ्यासक्रमात १० टक्के जागा वाढवून घेण्याचा प्रस्ताव शासनाकडे पाठविला जाईल, असे सांगितले. त्यामुळे चालू सत्रात ५०० विद्यार्थ्यांना या निर्णयाचा लाभ होणार आहे. या शिष्टमंडळात एनएसयूआयचे चंद्रपूर जिल्हाध्यक्ष स्वप्नील तिवारी, उपाध्यक्ष राहुल मानकर, शहर अध्यक्ष राजु अहीर, जिल्हा महासचिव मोन्टो मानकर, बल्लारपूर तालुकाध्यक्ष चेतन गेडाम, शहराध्यक्ष श्रीकांत आंबेकर, जिल्हा महासचिव आकाश मासिरकर यांचा समावेश होता. या शिष्टमंडळाने विद्यापीठ प्रशासनाशी चर्चा करून त्यांना पदवी व पदव्युत्तर अभ्यासक्रमात प्रवेशासाठी विद्यार्थ्यांना येत असलेल्या अडचणीची माहिती दिली व सदर अडचण दूर करण्यासाठी जागा वाढवून देण्यात याव्या, असे सांगितले. (जिल्हा प्रतिनिधी)