मतदारांमध्ये प्रभावीपणे जागृती करा

लोकशाही बळकट करण्यासाठी मतदानाचा हक्क सर्व नागरिकांनी बजावावा, याकरिता शासनाच्या सर्व विभागांनी एकत्रितपणे विविध माध्यमांद्वारे मतदारांमध्ये प्रभावीपणे जनजागृती करावी,

गडचिरोली : लोकशाही बळकट करण्यासाठी मतदानाचा हक्क सर्व नागरिकांनी बजावावा, याकरिता शासनाच्या सर्व विभागांनी एकत्रितपणे विविध माध्यमांद्वारे मतदारांमध्ये प्रभावीपणे जनजागृती करावी, अशा सूचना निवडणूक निरीक्षक कृपाशंकर यादव यांनी केल्या. मंगळवारी जिल्हाधिकारी कार्यालयाच्या सभागृहात स्वीप कोअर कमिटीची बैठक पार पडली. यावेळी मार्गदर्शन करतांना ते बोलत होते. या बैठकीला जिल्हा निवडणूक अधिकारी तथा जिल्हाधिकारी रणजीतकुमार, जिल्हा स्वीप समितीचे अध्यक्ष तथा जि. प. च्या मुख्य कार्यकारी अधिकारी संपदा मेहता, निवासी उपजिल्हाधिकारी राम जोशी, उपजिल्हा निवडणूक अधिकारी सुभाष चौधरी, अतिरिक्त पोलीस अधीक्षक राजकुमार शिंदे, जिल्हा पुरवठा अधिकारी आर. आर. चांदुरकर, गोंडवाना विद्यापीठाचे उपकुलसचिव डॉ. विजय सिल्हारे, नेहरू युवा केंद्राचे अखिलेश प्रसाद मिश्रा, दिवाकर सहारे आदी उपस्थित होते.यावेळी निवडणूक निरीक्षक कृपाशंकर यादव म्हणाले, अंगणवाडी सेविका व मदतनिसांच्या माध्यमातून मतदारांमध्ये जागृती निर्माण करावी. किशोरी समिती, माता भेट घेऊन त्यांना मतदानाचे महत्त्व समजावून सांगण्यासोबत मतदान करण्यासाठी प्रोत्साहित करावे, त्यांच्याकडे मतदार ओळखपत्राबाबत विचारणा करावी, ओळखपत्र हरविले असल्यास मतदारांना ही सुविधा उपलब्ध करून द्यावी. तसेच विशेष करून महिला मतदारांमध्ये मतदान करण्यासंदर्भात जागृती निर्माण करावी, असेही यादव यावेळी म्हणाले. भारतीय निवडणूक आयोगाने मान्यता दिलेले घोषवाक्य शाळांच्या भिंतीवर रंगवावेत. तसेच शाळकरी, महाविद्यालयीन मुलांना मतदान प्रक्रियेबाबत ईव्हीएम मॉक पोलद्वारे माहिती द्यावी, असेही त्यांनी यावेळी सांगितले. याप्रसंगी जिल्हाधिकारी रणजीतकुमार यांनी प्रशासनाच्या नियोजनबद्ध आराखडा व राबविलेल्या विविध उपक्रमाची माहिती पॉवर प्रेझेंटेशनद्वारे दिली. (स्थानिक प्रतिनिधी)