केंद्रप्रमुख झाले आॅनलाईन

शालेय पोषण आहारासह केंद्रातील विविध उपक्रमांची माहिती शासनाला तत्काळ आॅनलाईन सादर करता यावी,

लॅपटॉप उपलब्ध : शालेय पोषण आहाराच्या माहितीसाठी उपयोग गडचिरोली : शालेय पोषण आहारासह केंद्रातील विविध उपक्रमांची माहिती शासनाला तत्काळ आॅनलाईन सादर करता यावी, यासाठी गडचिरोली जिल्ह्यातील सर्वच १०३ केंद्रप्रमुखांसाठी लॅपटॉप उपलब्ध झाले आहेत. त्यामुळे केंद्रप्र्रमुख आता हायटेक होण्यास मदत होणार आहे. शासनाच्या मार्फतीने अनेक उपक्रम राबविले जात आहेत. या उपक्रमांचा आढावा दर आठवड्याला किंवा दरदिवशी शासनाच्या मार्फतीने घेतला जात आहे. केंद्रांतर्गत येणाऱ्या शाळांमधील उपक्रमांची तसेच शालेय पोषण आहाराची माहिती पाठविण्याची जबाबदारी केंद्रप्र्रमुखांची आहे. यापूर्वी केंद्रप्रमुख ही सर्व माहिती वरिष्ठांना कागदोपत्री सादर करीत होते. त्यामुळे माहिती संकलीत करण्यास उशीर होत होता. ही बाब लक्षात घेऊन शासनाने राज्यभरातील सर्वच केंद्रप्रमुखांना लॅपटॉप उपलब्ध करून देण्याचा निर्णय घेतला. त्यानुसार शासनाने गडचिरोली जिल्ह्यातील सर्वच १०३ केंद्रप्रमुख तसेच तालुकास्तरावरील शालेय पोषण आहार अधीक्षक व जिल्हास्तरीय लेखाधिकारी यांना लॅपटॉप उपलब्ध करून दिले आहे. सदर लॅपटॉप शालेय पोषण आहार विभागाच्या मार्फतीने उपलब्ध झाले आहेत. त्यामुळे शालेय पोषण आहाराचा आढावा घेण्याची जबाबदारी केंद्रप्रमुखांवर आली आहे. त्याचबरोबर ज्या शाळेत नेट कनेक्टिव्हीटी उपलब्ध नाही, अशा शाळेतील शिक्षक केंद्रस्तरावर जाऊन लॅपटॉपच्या मदतीने माहिती भरू शकणार आहेत. लॅपटॉपमुळे केंद्र प्रमुखांचे काम गतिमान होण्यास मदत होणार आहे. दोन दिवसांपूर्वी गडचिरोली जिल्हा परिषदेला लॅपटॉप उपलब्ध झाले. सदर लॅपटॉप सोमवारी तालुकास्तरावरील गट शिक्षणाधिकारी कार्यालयात पोहोचविण्यात आले आहेत. त्यानंतर लॅपटॉपचे वितरण संबंधित केंद्र प्रमुखांना केले जाणार आहेत. त्यामुळे लवकरच केंद्र प्रमुखांचे काम आॅनलाईन सुरू होण्यास मदत होणार आहे. (नगर प्रतिनिधी) इतरही कामांसाठी उपयोग सदर लॅपटॉप शालेय पोषण आहाराची माहिती शासनस्तरावर पाठविण्यासाठी उपलब्ध करून देण्यात आले आहेत. त्यामुळे या लॅपटॉपचा मुख्य उपयोग शालेय पोषण आहाराची माहिती भरण्यासाठीच होणार आहे. त्याचबरोबर इतरही कामे या लॅपटॉपवर केंद्र प्रमुख करू शकणार आहेत. शालेय पोषण आहाराचे दर दिवशीचे लाभार्थी, उपलब्ध साठा व लागणारा पोषण आहार याबाबतची माहिती शिक्षक मोबाईलद्वारे एमडीएम सॉफ्टवेअरवर भरत होते. मात्र ज्या शाळांमध्ये नेट कनेक्टिव्हिटी नाही अशा शाळांमधील शिक्षकांना माहिती पाठविण्यात अडचण जात होती. सदर शिक्षक आता केंद्र स्तरावर जाऊन माहिती भरू शकणार आहेत.