५६ अंगणवाडीसेविका व मदतनिस पेन्शनपासून वंचित

एकात्मिक बालविकास सेवा योजनेंतर्गत अगणवाडीसेविका मदतनिस, मिनी अंगणवाडीसेविका या मानधन कर्मचाऱ्यांना सेवानिवृत्तीनंतर किंवा त्यांनी राजीनामा दिला अथवा मृत्यू झाल्यानंतर लाभ देण्यासाठी ३ जुलै, २०१४ पासून राज्यात योजना सुरू करण्यात आली आहे. या योजनेंतर्गत अंगणवाडी सेविकांना १ लाख रुपये, तर अंगणवाडी मदतनिसांना ७५ हजार रुपये इतकी रक्कम देण्यात येत आहे. त्यानुसार, कुरखेडा तालुक्यातील ५६ अंगणवाडीसेविका मदतानिसांचे सेवानिवृत्ती, राजीनामा व मयत झालेल्यांचे प्रस्ताव वरिष्ठांकडे पाठविण्यात आले. त्यानंतर, ऑनलाइनही करण्यात आले. मात्र, अद्यापही लाभ मिळाला नाही. या समस्यांकडे संबंधित कार्यालयाच्या दुर्लक्षामुळे सदर अंगणवाडीसेविका व मदतनीस यांची रक्कम प्रलंबित आहे. त्यामुळे येत्या आठ दिवसांत पेन्शनचा लाभ द्यावा, अन्यथा संबंधित अधिकाऱ्यांना घेराव घालण्यात येईल, असा इशारा भारतीय जनता युवामोर्चा जिल्हाध्यक्ष चांगदेव फाये व पदाधिकाऱ्यांनी दिला आहे.