येथील पावरा सामाजातील केवलसिंग पावरा यांच्याकडे शनिवारी लग्न असल्याने मध्य प्रदेशातील पानसेमल तालुक्यात असलेल्या हटवाडी येथे राहणारा त्यांचा जावई काशीराम चिखल बारेला व अन्य नातवाईक लग्नघरी आले होते. शनिवारी लग्न आटोपल्यानंतर रविवारी जावई काशीराम पावरा आपल्या गावी परतही गेला होता. मात्र मंगळवारी रात्री पुन्हा तो जापी येथे आला. रात्री केवलसिंग पावरा यांच्याकडे मुक्कामाला होता. याच गावात केवलसिंगचा भाऊ व भाचा राहत असल्याने बुधवारी सकाळी केवलसिंगचा मुलगा व भाचा राजेंद्र रामसिंग बारेला हे घरातून बाहेर पडले असता, त्यांच्या मागोमाग काशीरामही घरातून बाहेर पडला.
केवलसिंगचा भाचा राजेंद बारेला व मुलगा हे दोघे कापडणे पाटचारीजवळून जात असताना अचानक मागावून काशीराम पावरा तेथे आला त्याने विळ्याने राजेंद्रच्या मानेवर व पोटावर वार केला. हा वार वर्मी लागल्याने राजेंद्र लागलीच खाली कोसळला. तर त्यानंतर आरोपीने केवलसिंग यांच्या मुलावरही वार करण्याचा प्रयत्न केला, मात्र तो पळून गेल्याने बचावला. घटनेनंतर काशीराम पावरा फरार झाला आहे. या घटनेची माहिती मिळताच तालुका पोलीस ठाण्याचे निरीक्षक हेमंत पाटील, सपोनि भूषण कोते, उपनिरीक्षक सागर काळे, एलसीबीचे प्रभाकर बैसाणे, श्रीकांत पाटील आदींनी घटनास्थळी धाव घेतली. यावेळी पोलीस पाटील मनोज गुजर, सरपंच भय्या पाटील आदी याठिकाणी उपस्थित होते. या घटनेने जापी गावात खळबळ उडाली आहे, शिवाय मुख्य संशयित राजेंद्र बारेला याच्या शोधासाठी पोलीस पथक रवाना झाले आहे.