मेहेरगाव येथील त्या तरुणाचा खून झाल्याचे निष्पन्न

धुळे : कावठे ता. धुळे शिवारात विहिरीमध्ये मृतदेह सापडलेल्या विजय विक्रम देसले (४१, रा. मेहेरगाव ता. धुळे) या तरुणाचा खून झाल्याचे निष्पन्न झाले असून, सोनगिर पोलिसांनी या गुन्ह्याचा एकाच दिवसात तपास लावून प्रवीण ऊर्फ भटू शरद भामरे या संशयिताला अटक केली आहे.

मयत विजय देसले हा शनिवारी शेतात जातो असे सांगून गेला होता. परंतु तो घरी परतला नसल्याने त्याचे काका ज्ञानेश्वर देसले यांनी सोनगिर पोलिसांत हरविल्याची नोंद केली होती. दरम्यान, मंगळवारी कावठे शिवारामध्ये शरद नारायण भामरे यांच्या शेतातील विहिरीत त्याचा मृतदेह आढळून आला. पोलिसांनी सुरुवातीला अकस्मात मृत्यूची नोंद केली होती. परंतु खून झाल्याचा आरोप नातेवाइकांनी केला होता. पोलिसांना शवविच्छेदन अहवालाची प्रतीक्षा होती. डोक्याला मार लागल्यामुळे त्याचा मृत्यू झाल्याचे शवविच्छेदन अहवालावरून स्पष्ट झाले. कुणीतरी घातक शस्त्र डोक्यात मारून त्याचा खून केला असावा या निष्कर्षापर्यंत पोलीस पोहोचले. उपविभागीय पोलीस अधिकारी प्रदीप मैराळे यांनी घटनास्थळी भेट देऊन सहायक पोलीस निरीक्षक प्रकाश पाटील यांना त्या दिशेने तपासाला गती देण्याच्या सूचना दिल्या.

दरम्यान, मयत विजय देसलेचे काका सयाजीराव देसले यांच्या फिर्यादीवरून सोनगिर पोलिसांनी प्रवीण ऊर्फ भटू शरद भामरे (२३, रा. मेहेरगाव) याच्याविरुध्द भादंवि कलम ३०२, २०१ अन्वये खुनाचा गुन्हा दाखल केला. दरम्यान, हा संशयित धुळे शहरात आपल्या मित्राकडे लपला असल्याची माहिती पोलिसांना मिळाली. त्यानुसार सोनगिर पोलिसांनी बुधवारी सापळा रचून त्याला अटक केली.

वरीष्ठ पोलीस अधिकाऱ्यांच्या मार्गदर्शनाखाली पोलीस उपनिरीक्षक प्रवीण निकाळजे, हवालदार शामराव अहिरे, अशोक पवार, शिरीष भदाणे, सदेसिंग चव्हाण, जाकिरोद्दीन शेख, अतुल निकम यांनी सापळा रचून संशयिताला पकडले.