धुळे : महावितरण कंपनीमध्ये राज्यात एकूण ८८ हजार ६६२ पदे मंजूर आहेत. त्यापैकी केवळ ५४ हजार ४४७ पदे भरलेली आहेत. महावितरणमध्ये हजारो पदे रिक्त असताना कर्मचारी वेळेचे बंधन न पाळता अविरत काम करत आहेत. ग्राहकांना चांगली सेवा देत वीजबिल वसुली करत आहेत. वीज ग्राहकांचे सेवक असलेले वीज कामगार आणि अभियंते यांच्यावर हल्ले करु नयेत, असे आवाहन कामगार नेते एम. जी. धिवरे यांनी केले आहे. राज्यात लाॅकडाऊन असताना कोरोनाची भीती न बाळगता रात्रं-दिवस काम करुन कर्मचाऱ्यांनी सर्वसामान्य ग्राहकांचा वीज पुरवठा सुरळीत ठेवला. अनेक वीज कामगारांना कोरोनाची लागण झाली. काही कामगारांना आपला जीवही गमवावा लागला. तरीही महावितरणचे सर्व अधिकारी आणि कर्मचारी वीज ग्राहकांना चांगली सेवा देत आहेत. वीजबिल माफ करणे किंवा कमी करणे हे कामगारांच्या हातात नाही. परंतु, कोरोनाच्या काळात शासनाने वेगवेगळ्या घोषणा केल्याचा त्रास कामगारांना सहन करावा लागत आहे. कोरोना काळातील वीजबिल माफी हवी असेल तर तशी मागणी सरकारकडे करणे संयुक्तिक ठरेल. एकीकडे वीजबिल वसुलीसाठी कामगारांवर प्रशासनाचा तगादा आहे तर दुसरीकडे वीज ग्राहकांकडून कामगारांवर हल्ले होत आहेत. अशा प्रकारचे हल्ले करु नयेत, असे आवाहन वर्कर्स फेडरेशनने केले आहे. तसेच कामगार किंवा अधिकारी ग्राहकांना अपशब्द वापरत असतील तर त्यांची नावे संघटनेकडे द्यावीत, असेही स्पष्ट केले.
दरम्यान, वीज कामगारांनाही कोरोना प्रतिबंधक लस त्वरित द्यावी, यासाठी संघटना प्रशासनासोबत वेळोवेळी पत्रव्यवहार करत आहे. तरीही अजून लसीकरण सुरु झाले नाही. प्रशासनाने यात लक्ष घालावे तसेच वीजबिल वसुलीसाठी जाणाऱ्या कामगारांना संरक्षण द्यावे, अशी मागणीही एम. जी. धिवरे, नाना पाटील, विरेंद्र पाटील, विशाल पाटील, प्रकाश कोळी, व्ही. पी. सूर्यवंशी, जळगाव झोनमधील संघटनेचे पदाधिकारी दीपक सोनवणे, विनोद सोनवणे, एस. आर. पाटील, ए. टी. बागुल आदींनी केली आहे.