पेट्रोल, डिझेल, खतांच्या किमतीत वाढ, मात्र पिकाचे भाव कमी
By लोकमत न्यूज नेटवर्क | Published: April 22, 2021 04:37 AM2021-04-22T04:37:27+5:302021-04-22T04:37:27+5:30
मालपूर : शिंदखेडा तालुक्यातील मालपूर परिसरात पेट्रोल, डिझेल, रासायनिक तसेच शेण खतांच्या किमतीत दरवर्षी प्रचंड वेगाने वाढ होत असल्याचे ...
मालपूर : शिंदखेडा तालुक्यातील मालपूर परिसरात पेट्रोल, डिझेल, रासायनिक तसेच शेण खतांच्या किमतीत दरवर्षी प्रचंड वेगाने वाढ होत असल्याचे दिसून येते. मात्र, त्या तुलनेत शेतपिकांच्या उत्पादनात वाढ न होता घट दिसून येते.
सध्या तर लाॅकडाऊनच्या नावाखाली शेतकरी नाडला जात आहे. आगामी खरीप हंगामाच्या मशागतीच्या कामांसाठी पैसा हातात नसल्यामुळे व्यापारी मागेल त्या भावात शेती उत्पादन द्यावे लागत आहे. यामुळे या पिकांना लागलेला खर्चदेखील निघत नसल्याने बिकट परिस्थिती सध्या मालपूरसह परिसरात झाली आहे.
डिझेलचे दर वाढल्यामुळे शेती मशागतीची कामे करणाऱ्या ट्रॅक्टरचालकांनी दर वाढवले. मात्र, शेतपिकांचे भाव गडगडल्याने यामध्ये अडचण निर्माण झाली. रासायनिक खतांच्या किमतीतही यावर्षी वाढ दिसून येत आहे. काहींनी आवश्यकता होती म्हणून लिंक पध्दतीने खते खरेदी करून पीक वाढीस लावले होते. तसेच या खतांबरोबर शेणखतदेखील आवश्यक असते. आधीच गुरांची संख्या कमी झाल्यामुळे शेणखतांच्या किमतीदेखील नुसत्या वाढल्या नसून गगनाला भिडल्या आहेत. यामुळे शेती करावी का पडून राहु द्यावी, असा येथील शेतकऱ्यांमध्ये संभ्रम निर्माण झाला आहे.