मागील वर्षी मार्च महिन्याच्या शेवटच्या आठवड्यापासून कोरोनाची लागण लागण्यास सुरुवात झाली होती. टप्प्याटप्प्याने सर्व दैनंदिन व्यवहार ठप्प झाले होते. बसेस बंद झाल्या, दुकाने बंद करण्यात आली. विनाकारण रस्त्यावर फिरणाऱ्यांना मज्जाव करण्यात आला. शासकीय असो वा खासगी रुग्णालयात कोरोनाबाधितांची संख्या वाढण्यास सुरुवात झाली. सर्व बंद होत असताना मात्र पोलीस रस्त्यावर होते. परिणामी रस्त्यावरून फिरणारे असो वा कोणीही त्यांची चौकशी करणे, त्यांच्यावर कारवाई करण्याचे काम सुरू झाले. शेकडो लोकांवर वर्षभरात गुन्हे दाखल झाले. त्यात विनामास्क असलेल्यांची संख्या बऱ्यापैकी होती. असे चित्र एकीकडे असताना पोलिसांनादेखील कोरोनाची बाधा होण्यास सुरुवात झाली होती. अनेक पोलीस कर्मचारी आणि अधिकारी रुग्णालयात दाखल होते. त्यांच्यावर उपचार सुरू होऊन ते पुन्हा आपल्या कामावर रुजू देखील झाले आहेत. दोन ते तीन जणांचा यात मृत्यूदेखील झाला आहे. अशी स्थिती वर्षभर कमी-अधिक प्रमाणावर होती. आता पुन्हा कोरोना वाढू लागला आहे. रुग्णालयात बेड मिळणे कठीण झाले आहे. अशा स्थितीत पोलीस आणि त्यांच्या कुटुंबीयांना काही त्रास झाल्यास आणि त्यांना रुग्णालयात बेड मिळाला नाही तर असा दूरदृष्टिकोन ठेवून पोलीस अधीक्षक चिन्मय पंडित यांनी पुढाकार घेवून पोलीस मुख्यालयात पोलिसांसाठी कोविड केअर सेंटरची निर्मिती केली आहे.
चौकट.......
पोलीस मुख्यालयात तयार करण्यात आलेल्या कोविड केअर सेंटरची पोलीस अधीक्षक चिन्मय पंडित यांनी पाहणी केली आहे. याठिकाणी बेडची व्यवस्था नीट आहे की नाही, डॉक्टर उपलब्ध आहेत का, त्यांना आवश्यक असणारी यंत्रसामग्री मिळत आहे का, पोलिसांना काही त्रास आहे का, यासह अनेक बारीकसारीक बाबींचा परामर्श घेतला जात आहे.