शिरपूर शहराकडे तापी नदी पात्रातून अवैध वाळू उपसा करून वाहतूक करणाऱ्या ट्रॅक्टरवर उंटावद गावात स्वत: उपविभागीय अधिकारी डॉ़विक्रमसिंग बांदल यांनी १५ रोजी सायंकाळी ५ वाजेच्या सुमारास कारवाई करीत ताब्यात घेतले असून सदर ट्रॅक्टर दंडात्मक कारवाईसाठी जमा करण्यात आला.
शिंदखेडा तालुक्यातील दोंडाईचा येथून उपविभागीय अधिकारी डॉ़ विक्रमसिंग बांदल हे कोरोना विषयक प्रशासकीय बैठक घेऊन शिरपूरकडे येत असताना उंटावद गावात गायत्री मंदिराजवळ उप्परपिंड शिवारातील तापी नदी पात्रातून वाळूचा उपसा करून वाहतूक करीत असताना स्वराज कंपनीचे ट्रॅक्टर आढळून आले़ संबंधित चालकाला ट्रॅक्टर थांबवून चौकशी केली असता सदर वाळूचा अवैध उपसा आढळून आल्याने सदर ट्रॅक्टर ताब्यात घेत दंडात्मक कारवाई महसूल कर्मचाऱ्यांच्या पथकास घटनास्थळी पाचारण करण्यात आले. त्यानंतर सदर ट्रॅक्टर दंडात्मक कारवाईसाठी उपविभागीय अधिकारी कार्यालयात जमा करण्यात आला. सदर कारवाई उपविभागीय अधिकारी डॉ. विक्रमसिंग बांदल यांच्या मार्गदर्शनाखाली नायब तहसीलदार गणेश अढारी, मंडळ अधिकारी पी.पी.ढोले, अव्वल कारकून प्रभाकर गावित, तलाठी विजय पाटील, गिरासे, वाहन चालक सतीश पाटोळे, संजय कोळी यांच्या पथकाने केली़