आदेशाचे उल्लंघन केल्यास एक हजार रुपयांचा दंड

धुळे : जिल्ह्यात कोरोना विषाणूचा प्रादुर्भाव रोखण्यासाठी ३० मार्च रोजीच्या मध्यरात्रीपासून प्रतिबंधित आदेश लागू करण्यात आला आहे. या आदेशान्वये सायंकाळी ९ ते सकाळी ७ वाजेपर्यंत पाचपेक्षा जास्त व्यक्तींना एकत्र येण्यास मज्जाव करण्यात आला आहे. या आदेशाचे उल्लंघन करणारी व्यक्ती एक हजार रुपयांच्या (प्रतिव्यक्ती) दंडास पात्र राहील, असा आदेश जिल्हादंडाधिकारी तथा जिल्हाधिकारी संजय यादव यांनी काढला आहे. कोरोना विषाणूचा प्रादुर्भाव रोखण्यासाठी राज्यात साथ रोग प्रतिबंधात्मक कायदा १३ मार्चपासून लागू असून, अंमलबजावणीसाठी अधिसूचना निर्गमित केली आहे. याबाबतची नियमावली प्रसिद्ध केली असून, जिल्हाधिकारी हे त्यांच्या कार्यक्षेत्रात कोरोना विषाणूवर नियंत्रण आणणे आणि त्याचा प्रादुर्भाव रोखण्यासाठी ज्या उपाययोजना करणे आवश्यक आहे त्यासाठी सक्षम प्राधिकारी म्हणून घोषित केले आहेत. राज्य शासनाच्या २७ मार्च रोजीच्या निर्देशानुसार जिल्ह्यातील लॉकडाऊनची मुदत १५ एप्रिल रोजीच्या रात्री १२ वाजेपर्यंत वाढविण्यात आली आहे, तसेच कोरोना विषाणूचा प्रादुर्भाव रोखण्यासाठी राज्य शासनाने जाहीर केलेल्या आदेशानुसार धुळे जिल्ह्यात पुढीलप्रमाणे आदेश देण्यात आले आहेत. ते असे- मुखपट्टी/ मास्कचा वापर : सर्व नागरिकांनी सार्वजनिक ठिकाणी, कामाच्या ठिकाणी त्याचप्रमाणे सार्वजनिक व खासगी वाहनातून प्रवास करताना मुखपट्टी/ मास्क वापरणे बंधनकारक आहे. सामाजिक अंतर राखणे : नागरिकांनी सार्वजनिक ठिकाणी वावरताना दोन व्यक्तींमध्ये किमान ६ फुटांचे अंतर राखणे बंधनकारक राहील. व्यापारी आस्थापनांमध्ये येणाऱ्या ग्राहकांमध्ये सामाजिक अंतर राखले जाईल, याची दक्षता घेणे बंधनकारक आहे. अशा आस्थापनांमध्ये एकावेळी पाचपेक्षा जास्त ग्राहक/ व्यक्ती असणार नाहीत. सार्वजनिक ठिकाणी थुंकण्यास प्रतिबंध : सार्वजनिक ठिकाणी थुंकणाऱ्या व्यक्तींविरुद्ध संबंधित प्राधिकरणाने कायदे व नियमाद्वारे निश्चित केलेल्या दंडाची आकारणी करावी. सार्वजनिक ठिकाणी दारू, पान, गुटखा, तंबाखू, सुपारी आदी खाण्यास/ पिण्यास प्रतिबंध करण्यात येत असल्याचा आदेश जिल्हाधिकारी संजय यादव यांनी दिला आहे.