मनुष्यबळाचे त्रैमासिक विवरणपत्र सादर करण्याचे आस्थापनांना आवाहन

सेवायोजन कार्यालये कायद्यान्वये सर्व सार्वजनिक क्षेत्रातील शासकीय, निमशासकीय तसेच खासगी क्षेत्रातील कायद्यांतर्गत असणाऱ्या आस्थापनांनी त्यांच्या आस्थापनेवरील सर्व कर्मचाऱ्यांची एकूण सांख्यिकी माहिती प्रत्येक तिमाहीस विहीत नमुदा ईआर- १ मध्ये नियमित राज्य शासनाच्या कौशल्य विकास, रोजगार व उद्योजकता विभागाच्या संकेतस्थळावरून ऑनलाइन पद्धतीने सादर करणे बंधनकारक आहे. जून २०२१ अखेर संपणाऱ्या तिमाहीची नमुना ईआर-१ मधील त्रैमासिक सांख्यिकी माहिती संकलनाचे काम जिल्हा कौशल्य विकास, रोजगार व उद्योजकता मार्गदर्शन केंद्र, धुळे या कार्यालयाद्वारे सुरू असून, या सर्व आस्थापनांकडून १०० टक्के प्रतिसाद मिळणे आवश्यक आहे. या सर्व आस्थापनांना या कार्यालयाकडून यापूर्वीच यूझर नेम व पासवर्ड देण्यात आलेले आहेत. त्याचा वापर करून प्रत्येक विभागाने या विभागाच्या संकेतस्थळावर लॉग इन करीत आपली अचूक माहिती ऑनलाइन पद्धतीने सादर करावी. तिमाही विवरणपत्र सादर करण्याची अंतिम तारीख ३१ जुलै आहे. तिमाही विवरणपत्र विहीत मुदतीत ऑनलाइन पद्धतीने सादर करून कायद्याचे अनुपालन करीत सहकार्य करावे. प्रत्येक आस्थापनेने आपला नोंदणी तपशीलदेखील आवश्यक ती सर्व माहिती नोंदवून तत्काळ अद्ययावत करावा, असेही आवाहन सहायक आयुक्त डॉ. कोल्हे यांनी केले आहे.