अक्कलपाडा पाणी योजनेच्या कामाला गती

वन विभागाची परवानगी : मोराने-नगावबारी पाईपलाईनचे काम सुरु

धुळे : मोराणे ते नगावबारीपर्यंत जलवाहिनी टाकण्याच्या कामातील वनविभागाचा अडसर दूर झाला असून धुळे शहरासाठीच्या अक्कलपाडा पाणीपुरवठा योजनेच्या कामाला पुन्हा गती प्राप्त झाली आहे. मोरोणे ते नगावबारी जलवाहिनीच्या मार्गात काही ठिकाणी वनविभागाची जमीन येत होती. वनविभागाच्या परवानगीसाठी काम रखडले होते. परंतु आता वनविभागाने परवानगी दिल्याने जलवाहिनीच्या कामाला सुरुवात झाली आहे.धुळे शहराचा पाणीप्रश्न सोडविण्यासाठी महत्त्वाच्या ठरणाऱ्या अक्कलपाडा पाणीपुरवठा योजनेत अक्कलपाडा धरणाजवळ जलशुध्दीकरण केंद्राचे बांधकाम सुरू आहे. या केंद्राची शुध्दीकरण क्षमता ६९ एमएलडी आहे. आतापर्यंत त्याचे २५ टक्केपेक्षा अधिक काम झाले आहे. या जलशुध्दीकरण केंद्रावरून धुळे शहरातील जलकुंभांना थेट पाणीपुरवठा होणार आहे.अक्कलपाडा प्रकल्पापासून शहरातील हनुमान टेकडी जलशुध्दीकरण केंद्रापर्यंत ४० किलोमीटर जलवाहिनी टाकण्याचे काम ३० किलोमीटरपर्यंत पूर्ण झाले आहे. तसेच मोरोणे गावापासून नगाव बायपासने नगावबारी जलकुंभापर्यंत १३ किलोमीटर जलवाहिनी टाकली जाणार आहे. अक्कलपाडा धरणातील पाणी तेथील जलशुध्दीकरण केंद्रात शुध्द केले जाईल. पाणी उचलण्यासाठी धरणाच्या क्षेत्रात जॅकवेल आवश्यक आहे. परंतु धरणाची पाणी पातळी अधिक असल्याने विहीर खोदणे शक्य नाही. त्यामुळे काम थांबले आहे. धरणाची पाणी पातळी कमी झाल्यावर जॅकवेलचे काम सुरू होणार आहे.विशेष म्हणजे या योजनेचे काम पूर्ण झाल्यावर शहराला एक दिवसाआड पाणीपुरवठा करण्याचे महानगरपालिकेचे नियोजन आहे. सध्या पाच दिवसाआड पाणीपुरवठा होत असल्याने नागरिकांची गैरसोय होते. पाच दिवस पुरेल इतके पाणी साठवणे सामान्यांना शक्य होत नाही. त्यामुळे शेवटच्या दिवशी पाण्यासाठी वणवण होते. उन्हाळ्यात अधिकच हाल होतात. अक्कलपाडा योजनेचे काम पूर्ण झाल्यावर धुळेकरांना दिलासा मिळणार आहे.