५ टक्के रुग्ण १६ वर्षांखालील, पण लस नाही;

१८ वर्षांवरील तरुणांना मिळणार १ मेपासून लस; निर्णय झाला असला तरी आदेशाची प्रतीक्षा

धुळे : कोरोनाच्या दुसऱ्या लाटेने शहरासह जिल्ह्यात महामारी पसरली असताना त्याचा स्ट्रेनही बदलला आहे. पहिल्या लाटेत ४५ वर्षांपेक्षा जास्त वयाच्या व्यक्तींना कोरोनाचा संसर्ग होण्याचे प्रमाण सर्वाधिक होते. परंतु आता ४५ च्या आतील व्यक्ती आणि १८च्या आतील मुलांनादेखील कोरोना होत आहे. त्यामुळे कोरोनाचा हा नवीन स्ट्रेन धोकेदायक ठरत आहे.

१८ ते ४५च्या आतील रुग्णांचे प्रमाण २७ टक्के आहे. असे असले तरी या वयोगटासाठी कोरोना प्रतिबंधक लसीकरण अजून सुरू झालेले नाही. दरम्यान, १८ वर्षांवरील सर्वांनाच लस देण्याचा निर्णय केंद्र शासनाने घेतला असला तरी हे लसीकरण १ मेपासून सुरू होणार आहे. तोपर्यंत या वयोगटातील रुग्णांचे प्रमाण वाढण्याची शक्यता नाकारता येत नाही. या वयोगटातील मृत्युदरदेखील दिवसेंदिवस वाढत असल्याने आरोग्य विभागासह शासन-प्रशासनालादेखील चिंता आहे. या वयोगटातील व्यक्तींना लसीकरणाची प्रतीक्षा आहे. परंतु ४५ वर्षांवरील निम्मेपेक्षा अधिक नागरिकांचे लसीकरण अजून झालेले नाही.

कोरोनाच्या या संसर्गात सर्वाधिक चिंतेची बाब म्हणजे लहान मुलांनादेखील कोरोना होण्याचा धोका वाढला आहे. १६ आणि १८ वर्षांच्या आतील रुग्णांचे प्रमाण सध्या ५ टक्के आहे. १८च्या आतील मुलांना लस देण्याबाबत अजून कोणताही निर्णय नाही. त्यामुळे भविष्यात या वयोगटामध्येदेखील संसर्ग वाढू शकतो. त्यामुळे लहान मुलांची काळजी घ्यावी, असे आवाहन प्रशासनाने केले आहे.

३५ ते ४५ वयोगटांतील कोरोनाबाधितांचा मृत्युदरदेखील वाढताे आहे. या वयोगटातील काही तरुणांचा जिल्ह्यात मृत्यू झाला आहे. दरम्यान, मृत्यूचे आकडे केवळ सरकारी रुग्णालयांचे जाहीर होत आहेत. खासगी रुग्णालयांचे आकडे जाहीर होत नसल्याने बाधितांचा आणि मृतांचा नेमका आकडा समोर येत नाही. अशा परिस्थितीत नागरिकांनी कोरोना नियमांचे पालन करणे गरजेचे आहे.

१६ वर्षाखालचे ५ टक्के रुग्ण, पण लसच उपलब्ध नाही

धुळे जिल्ह्यात १६ आणि १८ वर्षांखालील ५ टक्के रुग्ण आहेत. परंतु या वयोगटाला अजूनपर्यंत लसीकरण सुरू झालेले नाही.

या वयोगटातील रुग्णांची संख्या वाढत असताना शासनाने अजूनपर्यंत त्यांना लस उपलब्ध करून दिली नसल्याने पालकांमध्ये चिंता आहे.

लसीकरण नसल्याने या वयोगटातील रुग्णांची संख्या वाढण्याची भीती व्यक्त होत आहे. सर्वच वयोगटांतील नागरिकांना लसीकरणाची मागणी आहे.

काेरोनामुक्त झालेल्या इस्त्राईल देशात केवळ दोन टप्प्यांत लसीकरण झाले. त्याप्रमाणे सर्वांनाच दुसऱ्या टप्प्यात लस उपलब्ध करावी, अशी मागणी आहे.

४५ पेक्षा कमी वयाचे २७ टक्के रुग्ण; पण लसीकरण सुरू नाही

४५ पेक्षा कमी वयाचे २७ टक्के रुग्ण आहेत. परंतु या वयोगटासाठीदेखील लसीकरण सुरू झालेले नाही. त्यामुळे रुग्णसंख्या वाढत आहे.

१८ वर्षापेक्षा अधिक वय असलेल्या व्यक्तींचे लसीकरण करण्याचा निर्णय शासनाने घेतला असला तरी त्याचे दिशानिर्देश अजीन राज्य शासनाला प्राप्त झाले नाहीत.

मुलांसाठी लस येत नाही तोपर्यंत

मुलांसाठी लस येत नाही तोपर्यंत सर्वच कुटुंबांना आपापल्या मुलांची काळजी घ्यावी लागणार आहे.

लहान मुलांना लसीकरण नसल्याने शाळा तर बंदच आहेत, शिवाय सर्वच शिक्षण मंडळांनी दहावीच्या परीक्षा रद्द केल्या आहेत.

लहान मुलांना कोरोनाची लागण होण्याचे प्रमाण दुसऱ्या लाटेत वाढले असल्याने सर्वांचीच चिंता वाढली आहे.