साेनारी (जि. उस्मानाबाद) - परंडा तालुक्यातील साेनारी येथे विद्युत धक्का बसून तीन माकडांचा मृत्यू झाला. ही घटना शनिवारी सकाळी साडेअकरा वाजेच्या सुमारास घडली.
याबाबत मिळालेली माहिती अशी की, गावातील भवानीनगर परिसरातील पशुवैद्यकीय दवाखान्याजवळ नवीन ट्रान्सफाॅर्मर बसविण्यात आले आहे. सदरील ट्रान्सफाॅर्मरवरून विद्युत पुरवठा सुरू करण्यात आलेला नसला तरी वीज जाेडण्यात आलेली आहे. दरम्यान, मुख्य विद्युत लाईनपासून येणारी एक तार तुटून लाेखंडी खांबाला चिकटली हाेती. त्यामुळे ट्रान्सफाॅर्मरच्या लाेखंडी पाेलमध्ये विद्युतप्रवाह उतरला हाेता. याच लाेखंडी पाेलला माकडांचा स्पर्श झाल्याने जवळपास तीन माकडे शनिवारी सकाळी साडेअकरा वाजेच्या सुमारास दगावली. दरम्यान, याच ट्रान्सफाॅर्मरपासून ग्रामस्थांचीही नेहमी ये-जा असते. ग्रामस्थ देवानंद दुबळे यांनी वेळीच हा प्रकार निदर्शनास आणून दिल्याने अनर्थ टळला.