खासदार - आमदारांचा कळंबमध्ये चक्का जाम

केंद्रीयमंत्री नारायण राणे यांनी मुख्यमंत्री उद्धव ठाकरे यांच्याबद्दल वापरलेल्या अपशब्दांचे कळंब शहरात तीव्र पडसाद उमटल्याचे दिसून आले. मंगळवारी सकाळी अकरा वाजण्याच्या सुमारास शहरातील छत्रपती शिवाजी महाराज चौकात शिवसेनेचे तालुकाप्रमुख शिवाजी कापसे यांच्यासह शिवसैनिक एकवटत होते. यानंतर याठिकाणी नारायण राणे यांच्या विरोधात जोरदार घोषणाबाजी देण्यात आली. काही अवधीतच खा. ओमप्रकाश राजेनिंबाळकर, आ. कैलास पाटील यांनीही आंदोलनस्थळी येत आंदोलनात सहभाग नोंदवला. चौकात जवळपास दीड तास रस्ता रोखून धरत चक्का जाम आंदोलन करण्यात आले. यावेळी खा. राजेनिंबाळकर, आ. पाटील यांच्यासह युवासेनेचे राज्य विस्तारक नितीन लांडगे, तालुकाप्रमुख शिवाजी कापसे, युवासेनेचे उपजिल्हाप्रमुख सागर बाराते, शहरप्रमुख प्रदीप मेटे, युवासेनेचे तालुकाप्रमुख मनोहर धोंगडे, उपतालुकाप्रमुख भारत सांगळे, भागवत चोंदे, रूक्साना बागवान, डिकसळचे उपसरपंच सचिन काळे, लक्ष्मण हुलजूते, सुनील गायकवाड, हर्षद अंबुरे, अजित गुरव, भैय्यासाहेब खंडागळे, मंदार मुळीक, विशाल यादव, जनक कदम यांच्यासह मोठ्या संख्येने शिवसैनिक उपस्थित होते. दरम्यान, शिवसेनेचे तालुकाप्रमुख शिवाजी कापसे, युवा सेनेचे विस्तारक नितीन लांडगे, सागर बाराते, प्रदीप मेटे आदींनी मुख्यमंत्री उद्धव ठाकरे यांच्याबद्दल अपशब्द वापरल्याप्रकरणी केंद्रीय मंत्री नारायण राणे यांच्यावर गुन्हा दाखल करावा, असा अर्ज कळंब पोलीस ठाण्यात केला आहे.