Kalyan Crime: एका २१ वर्षीय इंजिनिअरिंगच्या विद्यार्थ्याने स्वतःच्या प्रेयसीला भेटण्यासाठी जुन्नरला जाण्याचा बेत आखला, पण या प्रवासाचा अंत एका निष्पाप टॅक्सी चालकाच्या खुनाने होईल, असे कोणालाही वाटले नव्हते. टिटवाळा ते जुन्नर या प्रवासादरम्यान माळशेज घाटात झालेल्या वादातून उबेर चालकाची गळा चिरून हत्या करण्यात आली. याप्रकरणी ओतूर पोलिसांनी आरोपी विद्यार्थ्याला बेड्या ठोकल्या आहेत.
टिटवाळा येथील रहिवासी असलेल्या आदर्श चंद्रकांत भालेराव (वय २१) याने ५ मार्च २०२६ रोजी दुपारी ३ च्या सुमारास आपल्या प्रेयसीला भेटण्यासाठी जुन्नरला जाण्यासाठी उबेर बुक केली होती. नासीर अहम्मद अन्सारी हा आपली कार घेऊन प्रवाशाला घेण्यासाठी पोहोचला. मात्र, माळशेज घाटातील सितेवाडी हद्दीत गणेशखिंड येथे लघुशंकेसाठी गाडी थांबवली असता, चालक आणि प्रवासी यांच्यात पैशांवरून जोरदार वाद झाला.
स्वसंरक्षणाचा बनाव की घातपात?
आरोपी आदर्शने पोलिसांना दिलेल्या कबुलीनुसार, चालकानेच त्याला चाकू दाखवून लुटण्याचा प्रयत्न केला होता. स्वसंरक्षणार्थ झटापट करत असताना आरोपीने चालकाच्या हातातील चाकू हिसकावून त्याच्या मानेवर सपासप वार केले, ज्यात नासीर यांचा जागीच मृत्यू झाला. नासीर यांचा मृतदेह घाटातील कठड्यावरून खाली फेकून दिल्यानंतर आरोपीने रक्ताने माखलेली तीच कार पुन्हा टिटवाळ्याच्या दिशेने पळवली.
रक्ताने माखलेल्या कारमुळे फुटले गुपित
नासीर अन्सारी बेपत्ता झाल्याने त्यांच्या भावाने ओतूर पोलीस ठाण्यात तक्रार दिली होती. दरम्यान, ७ मार्च रोजी पोलिसांना गणेशखिंड घाटात एक मृतदेह सापडला. दुसरीकडे, कल्याण-मुरबाड महामार्गावरील गोवेली गावाजवळ रक्ताने माखलेली इर्टिगा कार बेवारस अवस्थेत आढळून आल्याने परिसरात खळबळ उडाली होती. या कारचे फोटो सोशल मीडियावर व्हायरल झाल्यानंतर तपासाची चक्रे वेगाने फिरली.
तांत्रिक तपासाने आरोपी गजाआड
पुणे ग्रामीण पोलीस अधीक्षक संदीपसिंह गिल आणि त्यांच्या पथकाने उबेर कंपनीकडून मिळालेली माहिती, कारचे जीपीएस लोकेशन आणि सीसीटीव्ही फटेज तपासले. एका पेट्रोल पंपावरील फुटेजमध्ये आरोपी कारमध्ये इंधन भरताना कैद झाला होता. तांत्रिक पुराव्यांच्या आधारे ठाणे ग्रामीण स्थानिक गुन्हे शाखेने आदर्श भालेराव याला टिटवाळा येथून ताब्यात घेतले. न्यायालयाने आरोपीला १२ मार्च २०२६ पर्यंत पोलीस कोठडी सुनावली असून, पोलीस अधिक तपास करत आहेत.
Web Summary : An engineering student, planning to meet his girlfriend, murdered an Uber driver during a dispute in Malshej Ghat. The student, after abandoning the blood-stained car, was arrested based on technical evidence. Police investigation continues.
Web Summary : गर्लफ्रेंड से मिलने जा रहे इंजीनियरिंग के छात्र ने माळशेज घाट में विवाद के बाद उबर ड्राइवर की हत्या कर दी। खून से सनी कार छोड़कर भागे छात्र को तकनीकी सबूतों के आधार पर गिरफ्तार किया गया। पुलिस जांच जारी है।