Twisha Sharma : 'लिगेचर रिपोर्ट' समोर आल्याने मृत्यूचे कारण स्पष्ट; पण संशयाची सुई अजूनही सासरच्यांवर!

ट्विशा शर्मा मृत्यू प्रकरणात फॉरेंसिक 'लिगेचर रिपोर्ट' समोर आला आहे.

भोपाळमधील अत्यंत चर्चित आणि हायप्रोफाईल ट्विशा शर्मा मृत्यू प्रकरणाचे गूढ दिवसेंदिवस अधिकच जटील होत चालले आहे. आता या प्रकरणात आत्महत्येसाठी वापरण्यात आलेल्या बेल्टचा अत्यंत महत्त्वाचा फॉरेंसिक 'लिगेचर रिपोर्ट' समोर आला आहे. या फॉरेंसिक तपासणीत असे समोर आले आहे की, ट्विशाचा मृत्यू त्याच बेल्टमुळे झाला होता, ज्याने तिने गळफास घेतल्याचा दावा सासरच्यांनी केला होता. रिपोर्टनुसार, ट्विशाच्या गळ्यावर आढळलेले निशाण आणि त्या बेल्टची ठेवण, रुंदी तंतोतंत जुळल्या आहेत. फॉरेंसिक तपासणीत मृत्यूचे कारण आत्महत्या असल्याचे म्हटले आहे. मात्र, असे असूनही या प्रकरणातील संशयाचे ढग अद्याप मिटलेले नाहीत.

या प्रकरणात सर्वात मोठा प्रश्न हा निर्माण झाला आहे की, जर हा बेल्ट इतका महत्त्वाचा पुरावा होता, तर सुरुवातीच्या पोस्टमार्टमच्या वेळी तो डॉक्टरांना का उपलब्ध करून दिला गेला नव्हता? पोलिसांच्या या संशयास्पद विलंबावर आता संपूर्ण तपास प्रक्रिया आणि पोलीस प्रशासनाच्या भूमिकेवर गंभीर प्रश्नचिन्ह उपस्थित केले जात आहेत.

फॉरेन्सिक प्रक्रियेत 'लिगेचर मटेरियल' का असते महत्त्वाचे?

गुन्हे अन्वेषण आणि फॉरेन्सिक सायन्सच्या तज्ज्ञांच्या मते, गळफास घेतलेल्या प्रकरणांमध्ये 'लिगेचर मटेरियल' हा सर्वात मोठा आणि मुख्य पुरावा मानला जातो. याच्याच आधारे डॉक्टर आणि फॉरेन्सिक एक्सपर्ट हे ठरवतात की संबंधित व्यक्तीचा मृत्यू खरोखरच गळफास घेतल्याने झाला आहे, की आधी तिची हत्या करून नंतर शव लटकवण्यात आले आहे.

पट्ट्याची रुंदी, त्याची ठेवण आणि त्याचा गळ्यावर पडलेला दाब या सर्व गोष्टींची जुळवणी मृतदेहाच्या गळ्यावरील खुणांशी केली जाते. ट्विशा शर्माच्या प्रकरणात ही अतिशय महत्त्वाची कायदेशीर प्रक्रिया सुरुवातीच्या मुख्य पोस्टमार्टम दरम्यान पूर्ण होऊ शकली नव्हती, कारण पोलिसांनी तो बेल्ट डॉक्टरांना दिलाच नव्हता. माहितीनुसार, पोलिसांनी अवघ्या दोन दिवसांपूर्वी हा बेल्ट फॉरेन्सिक टीमकडे सोपवला, ज्यानंतर हा विस्तृत रिपोर्ट तयार करण्यात आला.

तपास पथकाची प्रतिक्रिया; रिपोर्ट कोर्टात सादर करणार

या धक्कादायक प्रकरणाचा तपास करणाऱ्या विशेष तपास पथकाचे प्रमुख आणि सहायक पोलीस आयुक्त डॉ. रजनीश कश्यप यांनी यावर आपली प्रतिक्रिया दिली आहे. त्यांनी सांगितले की, "या प्रकरणाच्या प्रत्येक पैलूचा पोलीस अतिशय गांभीर्याने आणि बारकाईने तपास करत आहेत. लिगेचर रिपोर्ट आमच्या हाती आला आहे. मात्र, हा कायदेशीर आणि गोपनीय दस्तऐवज असल्याने तो सार्वजनिक केला जाऊ शकत नाही. हा रिपोर्ट थेट न्यायालयात सादर केला जाईल."

पोलीस दबावाखाली? वडिलांचे गंभीर आरोप

दुसरीकडे, ट्विशाच्या वडिलांनी पहिल्या दिवसापासून भोपाळ पोलिसांच्या एकूणच कार्यपद्धतीवर आणि निष्काळजीपणावर तीव्र आक्षेप घेतले आहेत. सासरचे लोक कायदेशीर क्षेत्राशी संबंधित असल्याने पोलीस सुरुवातीपासूनच पुरावे लपवण्याचा किंवा त्यात फेरबदल करण्याचा प्रयत्न करत असल्याचा आरोप वडिलांनी केला आहे. "सुरुवातीला बेल्ट गायब ठेवणे आणि नंतर तो सादर करणे, हा तपासात वेळकाढूपणा करण्याचा आणि आरोपींना वाचवण्याचा डाव आहे," असा संताप पालकांनी व्यक्त केला आहे.

लिगेचर रिपोर्टने बेल्टचा संभ्रम दूर केला असला, तरी कोणत्या परिस्थितीत ट्विशाला हे पाऊल उचलावे लागले, तिचा छळ कोणी केला आणि पोलिसांनी सुरुवातीला निष्काळजीपणा का दाखवला, या प्रश्नांची उत्तरे मिळणे अजूनही बाकी आहे. मुख्य आरोपी पती अद्यापही फरार असून, पोलीस त्याचा शोध घेत आहेत.